Orsamentu Milliaun $10,396 Ba PN Aprovadu

DILI, (TATOLI) – Parlamentu Nasionál (PN), liuhosi votasaun iha faze espesialidade, aprova ona orsamentu privativu ba orgaun soberanu ne’e ho montante milliaun $10,396 ho rezultadu votasaun a favor 51, kontra  0, no abstensaun 11.

Entretantu orsamentu privativu ba PN, kategoria saláriu no vensimentu milliaun $5,083, bens servisu milliaun $4,383, transferénsia públika $930.000 ho totál orsamentu milliaun $10,396. 

Prezidente Parlamentu Nasionál (PPN), Arão Noé, esplika verba husi envelope fiskál ne’ebé mai husi governu milliaun $9,1, maibé haree husi planu orsamentu PN aprova millaun $10,396.

“Normalmente orsamentu ba parlamentu tinan hirak liubá milliaun $15 kada tinan, husi orsamentu milliaun $10,396 ne’ebé prevee durante 1 janeiru to’o fin juñu 2018, gasta ona millaun $4,6 tuir relatóriu ne’ebé aprezenta husi Sekretáriu Jerál iha reuniaun Konsellu Administrasaun”, tenik iha diskusaun espesialidade Orsamentu Jerál Estadu (OJE) 2018, sesta (31/8) ne’e iha plenária.

Nia hatutan husi orsamentu privativu ne’ebé PN prevee atu gasta ba oin mak milliaun $5 resin, haree ba atividade PN desde janeiru to’o juñu ladun iha, tanba PN dissolvidu, maibé husi fulan jullu ba oin kuandu tomada pose ba lejislatura dalima atividade ne’e nakonu.

“Presiza orsamentu atu finansia, sei laiha orsamentu, atividade sira labele la’o ho di’ak, tanba ne’e mak envelope ne’ebé governu fó mai ita la kumpre, maibé proposta husi ita, governu konsidera no tau ita nia orsamentu milliaun $10,396, nune’e verba ne’ebé ita presiza dentru saida mak governu prevee”, katak.

Nia mós dehan kona-ba resesu foin dadauk audiénsia komisaun sira ba OJE 2018, komisaun sira presiza asesór atu ajuda análize hodi fó pareser ba komisaun idak-idak.

“Tanba ne’e ami hanoin sujestaun komisaun C atu redús osan ba resesu nian, ne’ebé ita la halo, ami hanoin katak di’ak liu mantein osan ne’e hodi buka asesór balun tan hodi prenxe iha diskusaun OJE 2019 ne’ebé sei realiza iha outubru”, dehan. 

PPN akresenta orsamentu privativu la ultrapassa saida mak governu tau iha OJE 2018 liuhosi aprezentasaun Sekretáriu Jerál iha Konsellu Administasaun, tanba atraza ona kalendáriu aprezentasaun orsamentu PN nian, nune’e ho Konsellu Administrasaun nia permisaun husu Sekretáriu Jerál adianta draf ba governu hodi hatama ba proposta lei orsamentu.

Deputadu Bankada FRETILIN, Antoninho Bianco, hanesan mós membru Konsellu Administrasaun la konkorda verba balun liu-liu agora laiha resesu maibé tau iha verba ne’e, komisaun halo rekomendasaun tenke konkretiza ho proposta halo redusaun.

“Proposta orsamentu privativu parlamentu la liuhosi Konsellu Ministru no lori de’it mai atu hetan diálogu entre ita”, tenik.

Nune’e mós nia informa bankada uluk iha lima maibé agora iha bankada hitu, tanba ne’e presiza iha aumentu iha kustu atu kobre iha nesesidade bankada sira. 

Deputada Fernanda Lay husi Bankada CNRT ne’ebé hanesan mós Prezidente Komisaun C ne’ebé trata asuntu Finansa Públika bolu atensaun Konsellu Administrasaun kona-ba relatóriu pareser husi Komisaun C ne’ebé atu hamenus dotasaun, maibé tanba dotasaun la muda barak iha viajen balun komisaun husik no sei tau matan nafatin ba ezekusaun tuir rekomendasaun husi relatóriu pareser kona-ba orsamentu PN.

Jornalista: Julia Chatarina | Editora: Rita Almeida

Imajen: Deputadu sira halo votasaun iha diskusaun espesialidade Orsamentu Jerál Estadu (OJE) 20018 iha uma fukun Parlamentu Nasionál. Imajen António Goncalves