PN sei Sosa Viatura Foun ho Folin $41.000 Kada Karreta

DILI: Parlamentu Nasionál (PN) diskute ona hodi prevé osan atu halo rekizisaun sosa karreta foun ho marka Mitshusibhi Pajero hamutuk unidade 65 hodi fasilita deputadu ida-idak.

Seidauk iha konfirmasaun klaru kona-ba tipu karreta ho marka Pajero ne’e, maibé osan ne’ebé tau hamutuk $2.665.000. Signifika kada karreta foun ne’e sei ho folin $41.000.

Tuir lista presu karreta Mitshubishi Pajero tinan 2018 ho folin variedade konforme ninia tipu. Presu tuun liu maka Mitshubishi Pajero Sport Dakar 4X2 A/T folin $35.400, Pajero Sport 4X2 Ulimate AT folin $36.933, Pajero Sport 4x2 Ultimate Quartz White Pearl AT folin $37.133, no Pajero Sport Dakar 4x4 A/T folin $44.200.

Maski nune’e, seidauk iha konfirmasaun klaru tipu karreta Pajero saida maka Parlamentu Nasionál sosa atu serve deputadu sira.

Vise-Prezidente PN, Maria Angelina Sarmento hatete, orsamentu privativu PN nia iha kapitál menór Konsellu Administrasaun prevee duni verba atu sosa viatura foun hamutuk 65 hodi fornese ba deputadu sira atu uza halo servisu.

“Deside sosa karreta ho marka Pajero ho osan montante $2.665.000”, tenik nia, iha Uma Fukun PN, horisehik.

Nia dehan, PN durante ne’e hasoru difikuldade menus transporte atu fasilita deputadu sira ba halo servisu, liu-liu ba halo fiskalizasaun iha área remota.

Tanba ne’e, Konsellu Administrasaun PN deside atu sosa karreta foun ho marka Pajero ne’ebé iha trasaun, atu deputadu sira uza ba halo fiskalizasaun iha área rurál.

Angelina dehan, deputadu kinta lejizlatura hala’o kna'ar besik fulan lima ona maibé to’o ohin loron balun sei uza transporte privadu no balun uza hela mikrolete no motór mai hala’o knaar tuir konstituisaun haruka.

Jacinto Xavier | Independente