PR Konsidera MUTL La Sala

DILI, (TATOLI) - Prezidente Repúblika (PR), Francisco Guterres Lú Olo, konsidera Movimentu Universitáriu Timor-Leste (MUTL) ne’ebé iha semana kotuk halo manifestasaun hasoru membru Parlamentu Nasionál kona-ba kestaun sosa PRADO ne’e la sala.

“Estudante sira la sala tanba Konstituisaun garante direitu ba espresaun ninian ne’ebé halo parte ba direitu sidadaun hotu-hotu ninian. Ne’e duni, joven sira la sala bainhira sira halo demonstrasaun husu ba órgaun soberania sira saida maka hanesan sira nia aspirasaun,” Lú Olo ba jornalista sira iha Semitériu Santa Kruz, segunda ne’e, hafoin partisipa iha Komemorasaun Masakre Santa Kruz ba dala 27.

Nia dehan, estudante lubuk ida maka polísia kaptura ona, tan ne’e, hotu-hotu hein investigasaun atu hatene naksalak iha parte ne’ebé.

 “Presiza halo apuramentu ba faktu sira ne’ebé akontese no ida ne’ebé maka la akontese durante estudante sira halo manifestasaun iha sira nia kampus. Se la akontese, portantu sira laiha sala,” veteranu ne’e informa.

Iha semana kotuk, polísia konsege kaptura estudante hamutuk ema na’in 22 no oras ne’e iha hela sela preventiva, tanba tuir informasaun katak estudante hirak ne’e ultrapasa distánsia metru 100 ne’ebé Lei Manifestasaun prevé.

Estudante hirak ne’e ezije ba Parlamentu Nasionál (PN) atu kansela sosa kareta PRADO ba deputadu foun sira, maibé prefere uza de’it kareta tuan sira ne’ebé antes ne’e membru PN sosa tanba kondisaun sei di’ak hela.

Jornalista: Xisto Freitas | Editór: Manuel Pinto

Imajen: Prezidente Repúblika, Francisco Guterres Lú Olo, partisipa iha Komemorasaun Masakre Santa Kruz ba dala 27 iha Semitériu Santa Kruz. Imajen Ajénsia Tatoli/Xisto Freitas