DILI, (TATOLI) - Primeiru
Ministru, Taur Matan Ruak afirma, atu hadi’a kualidade servisu iha dalan luan
atu mosu remodelasaun ba estrutura oitavu governu, iha kualkér tempu maibé
adapta ba nesisidades.
“Remodelasaun tenke halo beibeik,
mezmu ita hatene buat hotu la’o di’ak, mais kuandu atu halo sei iha nia tempu,
ha’u seidauk iha programa konkretu ida mais normalmente buat sira nee la’o iha
nia tempu,” Xefe governu informa ba jornalista sira iha Palásiu governu, ohin.
Kona-ba membru governu pendente,
Xefe governu hatán, nia parte sei mantein dialog ho xefe estadu Francisco
Guterres Lú Olo hodi hetan solusaun, maibé nia subliña la’ós ida ne’e mak sai
razaun hodi halo remodelasaun.
“Hanesan Primeiru Ministru ha’u
seidauk baruk mezmu fulan lima ona tanba buka solusaun ba problema sira ne’e
permanente, “informa Eis Presidente Repúblika ne’e.
Iha fatin hanesan Eis Primeiru
Ministru, Mari Alkatiri husu ba jerasaun foun sira atu prepara aan hodi simu
responsabilidade nasaun bainhira jerasaun tuan husik ona knar ne’e.
Tuir Nia deklarasaun polítika
ne’ebé durante ne’e hasai ba públiku la’ós atu defama ka hatún lideransa ida ka
seluk, maibé, meius ida atu hametin estadu ho instituisaun sira.
“Aban bainrua ami fundador no
kontinuaodres sira ne’e besitua ona entrega maka estadu la’ós Xanana ou Mari ba
imi, maibé ami atu entrega estadu ho instituisaun hotu hotu,” Alkatiri esplika.
Alkatiri mós promete pronto atu
kolabora ho governu hodi apoiu ideas, maibé lakohi involve iha governu atu ukun
bainhira akontese remodelasaun.
Jornalista: Agapito dos Santos | Editór:
Manuel Pinto
Imajen: Primeiru Ministru, Taur
Matan Ruak (klaran) akompania hosi nia Espoza Isabel Ferreira no Espoza
Prezidente Repúblika Cidália Mouzinho Lopes, iha serimónia komemorasaun
aniversáriu proklamasaun unilateral RDTL ba dala-43, ohin iha Palásiu governu
Sem comentários:
Enviar um comentário