DILI, (TATOLI) — Komandante Jerál
Polísia Nasionál Timor-Leste (PNTL), Júlio da Costa Hornay, hateten situasaun
iha territóriu Timor laran durante selebrasaun Loron Boot Natal la’o hakmatek.
Nia dehan situasaun hakmatek
tanba iha koordenasaun serbisu di’ak entre Polísia Nasionál Timor-Leste (PNTL)
no FALINTIL-Forsa Defeza Timor-Leste (F-FDTL).
“Problema sira mosu hanesan joven
sira baku malu no tuda malu, polísia konsege halo atuasaun ne’ebé imediatu no
netraliza situasaun depois konsege lori balun ba submete prosesu investigasaun
kriminál,” Hornay ba jornalista sira iha Palásiu Prezidente Nicolau Lobato,
Bairru Pité, kinta ne’e, hafoin relata situasaun seguransa ba Prezidente
Repúblika, Francisco Guterres Lú Olo.
Nia mós hateten insidente ne’ebé
ema hotu la espera maka joven ida mate iha área Comoro, semana kotuk, ne’ebé
hetan sona hosi joven seluk no suspeitu ba kazu ne’eiha ona sela polísia.
“Kazu ne’ebé akontese ne’e fora hosi
ita hotu nia hakarak, maibé la’ós tanba seguransa laiha ne’e maka akontese,”
Komisáriu ne’e haklaken.
Hornay afirma katak kazu Comoro
nia motivu ne’e sei iha prosesu investigasaun nia laran, maibé informasaun
prelimináriu ne’ebé parte polísia simu katak vítima ne’e fa’an hela SDSB no
bainhira akontese problema iha ne’ebá, nia (vítima) hamriik bilaan depois ema
tebe ninia motór monu ba rai no bainhira nia hakruuk tún atu hasa’e nia motór
maka ema sona.
“Motivu ne’e artes marsiais ka
motivu seluk ita seidauk hatene. Hafoin investigasaun ramata maka ita foin
hatene,” nia esplika.
Entretantu, Komandante Jerál PNTL
esklarese, kazu laen oho fén iha Ermera, semana kotuk, suspeitu tama ona iha
prizaun preventiva, maibé motivu loloos polísia rasik seidauk hatene tanba iha
hela faze investigasaun.
Ulun boot PNTL ne’e apela ba ema
ida-idak atu konsidera moris ne’e vale liu hotu-hotu no sente katak moris ne’e
vale liu entaun hotu-hotu tenke asegura ida-idak nia vida, tanba polísia
seidauk iha kbiit atu monta postu iha kada bairu no efetivu (polísia) mós la
sufisiente atu koloka iha kada bairru.
Jornalista: Xisto Freitas | Editór:
Manuel Pinto
Imajen: Komandante Jerál Polísia
Nasionál Timor-Leste (PNTL), Komisáriu Júlio da Costa Hornay
Sem comentários:
Enviar um comentário