Deskonfia Kalbuadi-Sérgio ‘Halai Tuir’ Emília Pires

DILI: Bankada Partidu FRETILIN deskonfia Sekretáriu Jerál Partidu CNRT, Francisco Kalbuadi Lay no eis-Ministru Saúde, Sérgio Lobo, halai tuir ona eis-Ministra Finansas, Emília Pires, tanba Tribunál halo notifikasaun maibé sira laiha ona fatin.

Vise-Prezidente Bankada FRETILIN, Francisco Miranda Branco hateten, informasaun ne’ebé asesu katak eisministru na'in rua hetan notifikasaun husi Tribunál, maibé sira sees ona husi Timor.

Eis-ministru na'in rua ne’e ida hetan karta notifikasaun no ida hetan karta mandadu kapturasaun, maibé seidauk to’o nia loron ema balun fó sai ona informasaun tanba ne’e sira sees aan tiha.

“Ami hetan informasaun no hetan telefone husi sidadaun sira katak eis-ministru na'in rua halai fali ona. Ne’e ita lakohi atu Emília Pires seluk mosu tan fali iha Timor”, dehan nia, iha Uma Fukun PN, horisehik.

Branco dehan, Timor-Leste iha presedente ona tanba antes ne’e eis-Ministra Finansas, Emília Pires, mós halai sees husi justisa. Tanba ne’e, hanesan Bankada Opozisaun lakohi atu Emília Pires seluk mosu tan iha nasaun ne’e.

Preokupasaun boot tebes maka oinsá ema sira ne’e hetan lalais informasaun husi Tribunál, karik ema ruma iha ne'ebá la garante segredu justisa, ne’e presiza haree didi'ak.

Nia hateten, atu garante hodi haruka fila ema sira ne’ebé halai ba estranjeiru presiza kria lei estradisaun, maibé ne’e sai hanesan servisu boot ba governu atu haree.

Tanba, atu implementa lei ne’e presiza iha konkordánsia entre nasaun sira ne’e presiza koopera hodi implementa lei ne’e rasik.

Antes ne’e, tuir Presidente Bankada Partidu CNRT Duarte Nunes hateten, Sekretáriu Jerál Partidu CNRT Francisco Kalbuadi Lay no Sérgio Lobo la halai, sira sei koopera ho justisa karik iha notifikasaun ruma husi Tribunál.

“Sekretáriu Jerál Partidu CNRT antes hetan xamada husi Tribunál nia iha tiha ona estranjeiru” Dehan nia iha PN foin lalais ne’e.

Presidente Bankada CNRT ne’e rona katak Tribunál halo karta notifikasaun duni ba Sekretáriu Jerál Partidu CNRT maibé momentu ne’e nia la iha fatin.

Bain hira ema la iha fatin depois lori karta notifikasaun mai oinsá mak bele dehan ema ne’e halai husi justisa, hare husi prosesu ne’e hanoin katak informasaun iha públiku ne’e la loos.

Duarte esplika bain hira loos mak Sekjer ne’e fila mai seidauk hatene loos tanba tuir informasaun ne’e nia ba iha Malázia.

Jacinto Xavier | Independente