DILI, (TATOLI) – Komandante
Jerál Polísia Nasionál Timor-Leste (PNTL), Komisáriu Júlio da Costa Hornay,
hateten PNTL no FALINTIL-Forsa Defeza Timor-Leste (F-FDTL) sei la fó fatin ba
individu sé de’it atu kria instabilidade.
“Ba kestaun polítika, ha’u fiar
katak ita nia lider sira sei rezolve no ita sei suporta para buat ne’e la’o
di’ak. Husu ba sidadaun atu hala’o de’it atividade hodi sustenta moris no
eskola duké ba buka moras”, hatete Komandante Jerál PNTL ne’e ba jornalista
sira iha Palásiu Prezidente Nicolau Lobato, Bairru Pité, kinta ne’e, hafoin
hasoru Prezidente Repúblika.
Nia husu ba ema hotu lalika
pániku ho boatus, tanba PNTL no F-FDTL sei la fó oportunidade ba ema ida atu
kria instabilidade no kompromete halo esforsu atu asegura.
Iha biban ne’e, nia haktuir
Prezidente Repúblika apresia serbisu PNTL no F-FDTL tanba apoiu malu hodi
asegura selebrasaun Natal no Tinan Foun la’o hakmatek tebes.
Tuir Júlio Hornay situasaun iha
tinan foun (2019) ne’e hakmatek tebes, lahanesan iha tinan kotuk, maske iha
akontese insidente no asidente ki’ik.
Hornay dehan informa ba Xefe
Estadu kona-ba kazu balun ne’ebé importante, liu-liu foin lalais bainhira PNTL
halo opesaun ba bola guling iha Dili laran ne’ebé deteta instituisaun (PNTL)
nia ema involve iha laran no oras ne’e loke ona prosesu disiplinár ba membru
ne’ebé deskonfia involve iha laran (bola guling).
“Ita hein katak prosesu
investigasaun ne’e bele rezulta buat ruma para komandu bele fó medida
disiplinár ne’ebé forte liu”, afirma.
Jornalista: Xisto Freitas | Editora:
Rita Almeida
Imajen: Komandante Jerál Polísia Nasionál
Timor-Leste (PNTL), Júlio da Costa Hornay
Sem comentários:
Enviar um comentário