Governu Kontinua Halo Abordajen Integrada Jéneru Hodi Hamenus Dezigualdade

DILI, (TATOLI) - Governu liuhosi Sekretária Estadu Igualdade no Inkluzaun (SEII) kontinua halo abordajen jéneru hodi hamenus dezigualdade iha sosiedade.

“Ha’u haksolok ho Asosiasaun Emprezariál Feto  Timor-Leste (AEMTL-sigla portugés) nia hanoin atu prepara feto, nune’e maka SEII kontinua halo abordajen integrada jéneru no inkluzaun, halo advokasia no halo promosaun igualdade jéneru no inkluzaun atu bele hamenus dezigualdade iha ita nia sosiedade”, hateten SEII, Maria José da Fonseca Monteiro de Jesus, liuhosi nia diskursu iha serimónia abertura simpóziu ekonómiku internasionál ne’ebé organiza hosi AEMTL hodi komemora aniversáriu AEMTL ba da-XI ne’ebé konsentra iha Embaixada Portugal iha Dili, Sesta (26/4/2019).

Maria José da Fonseca Monteiro de Jesus, hateten, sosiedade hahú globalizadu, integradu, modernu no dezenvolvidu ekonomikamente no sosialmente maka hatuur iha prinsípiu inkluzaun, toleránsia no igualdade jéneru, maske regra internasionál universál hateten igualdade feto ho mane hanesan direitu fundamentál ema nian ne’ebé labele viola maske iha progresu lubuk ida maibé grupu feto kontinua enfrenta diskriminasaun, marjinalizasaun no inkluzaun. Nune’e maka Governu Timor-Leste liuhosi SEII harii polítika no estratéjia hodi haree ba asuntu empoderamentu feto iha ekonomia.

Nia esplika katak, igualdade jéneru no inkluzaun hanesan pillar importante, la’ós de’it ba dezenvolvimentu sustentável, maibé mós ba merkadu servisu nian.

“Ha’u fiar katak hakbiit ekonomia feto no inkluzaun finanseira hanesan investimentu ne’ebé loos, justu, intelijente no esensiál, inklui sai hanesan xave hodi atinje ajenda dezenvolvimentu sustentável tinan 2030”, afirma SEII Maria José da Fonseca Monteiro de Jesus.

Nia hatutan, governu da-ualu hakarak setór privadu sira sai parseiru forte atu governu kontinua hamosu polítika atu fó biban no halo forte setór privadu.

Timor-Leste ho porsentu 40, feto sira daudaun ne’e envolve iha setór privadu no sira hatudu kompromisu aas hodi kontribui ba dezenvolvimentu ekonómiku nasaun nian liuhosi setór privadu ne’ebé forte.

Jornalista: Zezito Silva | Editór: Francisco Simões

Imajen: Hasai imajen hamutuk iha serimonia aniversariu AEMTL ba da-XI, Sesta (26/4/2019). Imajen/CCI-TL