Lú Olo Preokupa Lei GAM sei Fraku

DILI: Prezidente Repúblika (PR), Francisco Guterres Lú Olo, preokupa ho implementasaun Lei Grupu Arte Marsiál (GAM) ho númeru 5/2017 ne’ebé sei fraku, tanba realidade grupu sira ne’e bandu ona maibé iha terrenu kontinua eziste.

“Prezidente Repúblika preokupa uluk kona-ba lei númeru 5/2017. Ita iha lei maibé nia implementasaun la di’ak hanesan arte marsiál tolu KORK, IKS no PSHT bandu ona labele hala’o atividade, maibé tanbasá iha terrenu kontinua eziste, ema treinu subar, tanba ne'e ita presiza haree atu solusiona,” haktuir Sekretáriu Estadu Nélio Isaac ba jornalista sira, hafoin halo sorumuto ho Presidente Republika.

Nia hatutan, lei iha ona maibé implementasaun laiha ka ema sira ne’ebé toma konta ba iha kaer lei maka iha problema ka oinsá. Tanba ne'e, Prezidente Repúblika ho ideia rua, ida maka rezolve asuntu polítiku no segundu maka oinsá haree kona-ba lei ne’e.

Tanba ne'e, Prezidente Repúblika husu se iha ona lei ne’ebé forte tanbasá implementasaun fraku hela no tanbasá iha envolvimentu grupu arte marsiál barak, ne’ebé polísia halo atuasaun maibé depois liberta ema kriminozu sira, no tanbasá lei ida bandu nusa maka arte marsiál tolu sei eziste nafatin ho nune’e tenke rezolve.

Iha soru-mutu ekipa KRAM rekomendasaun hato'o mós ba Prezidente Repúblika aseita mós ida ne'e hodi tuur hamutuk hodi ko'alia kona-ba problema hirak ne'e, nune'e desizaun ikus liu sei fila ba Governu atu haree kona-ba arte marsiál tolu. Regula ho rigór ema hotu tenke kumpre lei iha nasaun ne'e atu bele sai sidadaun di’ak.

Cristina Ximenes | Independente