DILI: Sosiadade sivil sira
kestiona Komisaun Inkeritu Parlamentar (KIP) ne’ebé la konsege aprova sirania
relatoriu, maske durante hala’o serbisu sira uza sasan no osan estadu nian.
Hanesan públiku hatene, KIP la
konsege aprova sira-nia relaróriu finál ba projetu 143. Membru KIP sira akuza
no duun-malu de’it.
Ba serbisu KIP ne’ebé laiha
rezultadu, Diretór Ezekutivu FONGTIL, Daniel Carmo dos Santos konsidera
deputadu sira hatudu katak sira laiha moral.
“Durante sira-nia atividade
inkeritu sira uza sasan estadu nian hanesan karreta, perdiem, kombustivel.
Maibé to’o ikus la konsege produs relatoriu. Ne’e signifika sira komete
esbanjamentu ka estraga rekursu estadu nian, laiha efisiensia no efikas,”
deklara Diretór Ezekutivu FONGTIL ne’e iha nia knar-fatin, Kinta (25/04).
Tuir nia, bainhira iha
organizasaun ida halo planu no programa ruma, tenke iha rezultadu.
“Maibé atividade KIP ne’e laiha
rezultadu tanba relatoriu ne’e rasik sumba iha PN, ne’e deputadu sira immoral,”
deklara nia.
Daniel hatete, projetu 143 ne’ebé
implementa molok tama eleisaun Parlmentár ho maneira ajudikasaun direita nakonu
ho tendensia polítika tanbá ne’e projetu sira la liu tenderizasaun no laiha
kontratu.
Iha governu anterior, sempre mosu
debate atu selu maibé deputadu sira iha PN dada malu no to’o eleisaun
antesipada, to’o ohin loron mós kontinua dada-malu, ikus mai PN kria KIP hodi halo
inkeritu ba implementasaun projetu ne’e.
Maibé, hafoin halo serbisu, KIP
la konsege aprova relatoriu. Tan ne’e hamosu deskonfiansa husi Diretór
Ezekutivu FONGTIL katak iha mós involvimentu indireita husi deputadu balun.
“Iha Komisaun (KIP) ne’e
deskonfia deputadu balun mós envolve, maske la direita maibé pesoál
koletivamente entermus polítika, liu husi ninia ema sira iha partidu laran no
familia balun,” Daniel deskonfia.
Tuir Daniel, konsekuensia husi
politiku sira halo fiskalizasaun mak ne’e, sira mai ho versaun polítiku nune’e
sira dada-malu tanba interese grupu, pesoál no partidária.
“KIP ne’e bankada partidu
opozisaun no bankada governu envolve hotu, bainhira sira la konsege aprova
relatóriu sira rasik hatun kredibilidade segundu orgaun soberania ne’e iha
públiku.”
Daniel dehan, maske projetu ne’e
barak mak laiha kualidade no abandonadu, maibé iha projetu balun konsege
finalize ho di’ak.
Maibé, tanba relatoriu KIP sumba
iha PN implika emprezariu Timor-oan sira, tanba laiha dalan ba Ministériu Obras
Públika, KAFI, no ADN atu halo desizaun hodi halo pagamentu ba projetu
implementadu sira.
Bainhira MOP ho ADN foti desizaun
hodi selu, nia esplika, sira tenke ba halo deklarasaun ka fó informasaun ba
Ministériu Públiku, Komisaun Anti Korupsaun (KAK) nia oin hodi fó razaun tanba
saida mak sira tenke selu projetu ne’e.
Daniel hatete, orgaun ne’ebé iha
poder tomak atu halo desizaun tuir lei mak PN.
“Bainhira sira la brani halo
aprovasaun ba sira-nia rezultadu fiskalizasaun signikfika katak sira rasik la
valoriza sira-nia knaar nu’udar fiskalizadór tanba de’it interese ki’ikoan
ida.”
Nia dehan, iha KIP nia relatoriu
bainhira mensiona katak ema ne’ebé halo desizaun hodi fó projetu mak sala sei
prosesa tuir lei.
“(Ema ne’ebé hola desizaun) ema
ida rua de’it entaun prosesa sira tuir lei hodi haree fila fali ba regras sira
nune’e bele halo pagamentu ba kotratór sira.”
Tuir Diretór FONGTIL ne’e,
bainhira deputadu sira kontinua dada-malu, instituisaun estadu sira hanesan
KAK, PDHJ, Inspetór Jeral Estadu, no Sosiedade Sivíl sira bele halo ninia
serbisu hodi buka tuir tanba saida mak relatóriu ne’e produs tiha maibé la
konsege aprova.
“Saida mak sala iha (relatoriu)
ne’ebá, karik sira aprova tauk kona hotu sira ka oinsá”.
Daniel dehan, ema hotu nia
espetativa katak projetu kiik ka boot tenke la’o tuir prosesu aprovizionamentu.
“Karik la tuir ne’e kotra lei ne’ebé
vigora, entaun loke dalan ba KAK atu halo investigasaun,” nia hatete.
Iha fatin ketak tuir Ministru
Reforma Lezijlativa Asuntu Parlamentar (MRLAP), Fidelis Leite Mangalhães,
projetu hirak ne’ebé iha kontratu governu selu daudaun ona no sira seluk governu
sei halo hela revizaun.
“Projetu ne’ebé la tama lista KIP
nian konforme husi Ministeriu Obras Públika hato’o katak projetu 20 resin, sira
ne’e ita presiza verifika didi’ak hafoin governu foti desizaun ruma,” dehan nia
iha Palasiu Governu.
Ba projetu ne’ebé tama lista KIP,
Fidelis hatete, tenke konfirma ho Parlamentu Nasionál maibé governu nian
pozisaun projetu ne’ebé la tama lista, governu sei haree.
Jacinto Xavier | Independente
Imajen: Diretor Executivo de FONGTIL,
Daniel Carmo dos Santos
Sem comentários:
Enviar um comentário