Liutiha tinan 24 hosi relasaun
ne'ebé kortadu, ohin loron Portugal ho Indonézia hanesan "parseiru di'ak
sira" no forma ho Timor-Leste "amizade trilateral ida", defende
hosi embaixador Indonézia nian iha Portugal, iha entrevista ida ba ajénsia Lusa.
Iha tinan ida ne'ebé asinala
tinan 20 kona-ba hahú fali relasaun diplomátiku sira entre Portugal ho
Indonézia no realizasaun referendu kona-ba autodeterminasaun Timor-Leste nian,
Ibnu Wahyutomo asegura katak ohin loron laiha problema ida iha relasaun entre
nasaun tolu ne'e.
"Ema indonéziu sira ho ema
timoroan sira, ami laiha problema ida entre ami. Ami iha amizade trilateral ida
- Portugal, Indonézia ho Timor-Leste - no bainhira no iha ne'ebé maka iha parte
ida hosi triángulu ne'ebé envolvidu, parte sira seluk tenki envolve mós. Ami
hanesan parseiru di'ak tebes", nia hatete.
Maski nune'e, nia admiti katak
bele iha entre ema sira ne'ebé joven liu ideia katak Indonézia hanesan agresor
relativu ho Timor-Leste.
"Iha joven sira ne'ebé la
hatene Istória entre Indonézia ho Timor-Leste karik sei iha ideia hosi
Indonézia ida ne'ebé hanesan agresor, maibé sira ne'ebé hatene Istória hatene
no laiha resentimentu kona-ba pasadu", nia adianta.
"Ami nia belun timoroan sira
ajuda ona esplika ba ema portugés sira katak agora ami hanesan viziñu sira no,
ksolok tebes, hanesan viziñu di'ak sira", hatutan hosi diplomata.
Ho Portugal, relasaun diplomátiku
sira "hanesan di'ak", maski rekoñese katak "laiha nia pontu
máximu".
"Iha di'ak barak iha
komunikasaun no iha relasaun sira entre nasaun rua no povu rua dezde loke fali
embaixada sira iha Lisboa ho Jakarta", nia konsidera.
Vizita hosi Prezidente Cavaco
Silva, iha tinan 2012, ba Indonézia ho deslokasaun hosi xefe Estadu indonéziu,
Susilo Bambang Yudhoyono, ba Portugal iha tinan 2014, rekupera ona vizita ho
nível importante sira entre nasaun rua, ne'ebé interompe dezde dékada 60,
bainhira Prezidente indonéziu iha momentu ne'ebá, Sukarno, vizita ona Portugal.
Ibnu Wahyutomo rekorda ona, iha
sekuénsia hosi vizita sira ne'e, katak estabelese ona akordu ho memorandu oioin
hodi hadi'a relasaun sira", manifesta espetativa katak Prezidente Marcelo
Rebelo de Sousa bele halo viajen ofisial ida ba Indonézia "iha tinan ne'e
ka tinan oinmai".
Nia hatete katak hein atu
Prezidente Indonézia nian, Joko Widodo, ne'ebé konkore iha loron 27 Maiu ba
mandatu daruak, bele retribui mós vizita.
Marcelo Rebelo de Sousa ho Joko
Widodo "hanesan tebes, popular, besik ba populasaun, vizionáriu".
"Sira iha asaun ne'ebé hanesan no ha'u fiar katak sira sei fó malu di'ak",
nia hatutan.
Ibnu Wahyutomo, ne'ebé asumi ona
hanesan misaun fó koñese Indonézia ba ema portugés sira aleinde Bali, aposta
maka'as iha realizasaun hosi interkámbiu kultural sira entre artista sira hosi
nasaun rua no asegura katak sente ona rezultadu sira.
"Bainhira ha'u aprezenta
ha'u nia kredensial sira ba Prezidente Marcelo Rebelo de Sousa, ha'u hatete ba
nia: ami hakarak atu ema portugés sira koñese Indonézia la'ós liuhosi de'it
Bali no atu ema indonéziu sira hatene Portugal aleinde Cristiano Ronaldo",
nia hatete.
Embaixador aponta ona katak
"númeru hosi turista portugés sira ne'ebé ba Indonézia aumenta ona
tinan-tinan", indika katak aumenta ona hosi rihun 18 resin iha tinan 2013
ba kuaze rihun 37 iha 2018.
Embaixador adianta katak
kaptasaun hosi interese portugés la'ós hanesan fásil tanba, tuir nia hatete,
"emprezáriu portugés sira mantén hanoin katak Indonézia hanesan dook
tebes".
Maski nune'e, investimentu
portugés aumenta daudaun, agora ho projetu portugés hamutuk 21 iha Indonézia
liuliu iha hotel sira ho restaurante sira.
Saldu hosi balansa komersial
entre nasaun rua hanesan negativu ba Portugal, ho importasaun portugés sira
hosi Indonézia to'o euro millaun 138 iha tinan 2018 kontra millaun 14,2 iha
esportasaun sira ba nasaun aziátiku ne'e.
Iha janeiru tinan ne'e, Indonézia
sai hanesan fornesedor ba dala 40 ba Portugal no kliente númeru 115.
Sapatu, tekstil, plástiku sira,
boraxa no produtu agríkola sira hanesan produtu prinsipal sira ne'ebé Portugal
sosa iha Indonézia, ne'ebé ba Portugal liuliu makinaria, kímiku sira, pasta
surat-tahan nian ho produtu hahán sira nian.
"Portugal hanesan importante
ba ami hosi pontuvista ekonómiku tanba hanesan merkadu ida ne'ebé la'ós
tradisional, merkadu ida ho oportunidade maka'as no ne'ebé la haree. Karik
tanba nia pozisaun iha kantu Europa nian. Hanesan nasaun ida ne'ebé ema
indonéziu sira nunka haree", nia hatete.
Liutiha tinan 24 relasaun ne'ebé
hakotu tanba kestaun Timor-Leste nian, Portugal loke seksaun ida hosi interese
sira iha Jakarta, iha tiann 1999, no loke hamutuk reprezentasaun hanesan ida
hosi Indonézia iha Portugal.
Maski iha reprezentasaun
diplomátiku ida iha Jakarta dezde dékada dahuluk sira hosi sékulu 20,
embaixadora portugeza dahuluk iha nasaun maka atual eurodeputada Ana Gomes,
ne'ebé xefia ona seksaun hosi interese aberta sira iha 30 Janeiru 1999 no loke
fali embaixada iha loron 12 Jullu 2000.
Titular hosi kargu atual maka Rui
do Carmo dezde fulan-Novembru tinan 2016.
Rejistu hosi Ministériu Negósiu
Estranjeiru hatudu katak reprezentante dahuluk portugés nian iha Timor-Leste
maka Vasco Vieira Garin, ne'ebé halo parte iha misaun espesial to'o tinan 1950,
tuir reprezentante na'in 10, entre enkaregadu sira negósiu nian, ministru
plenipotensiáriu sira no to'o kónsul jeral ida, António Pinto da França.
Guilherme de Sousa Girão sai
hanesan diplomata ikus iha Jakarta antes interupsaun ne'ebé dura tinan 24 nia
laran, ne'ebé hahú loron haat hafoin invazaun indonéziu iha Timor-Leste no
ne'ebé dura to'o loron 30 Janeiru 1999, bainhira Ana Gomes loke seksaun
interese nian.
Lusa | SAPO TL
Sem comentários:
Enviar um comentário