sábado, 17 de março de 2018

Nasaun sira CPLP nian hakarak aumenta "komérsiu no investimentu" iha luzófonu nia laran


Ministru sira Komérsiu nian hosi Komunidade Nasaun sira Lian Portugeza nian (CPLP) desidi ona iha loron-tersa iha Brazília hodi "hametin esforsu sira" hodi aumenta "movimentu hosi komérsiu no investimentu" entre Estadu-membru sira hosi komunidade luzófonu.

"Hametin esforsu sira hodi dezenvolve movimentu komérsiu ho investimentu entre Estadu-Membru sira CPLP nian" hanesan pontu ida hosi pontu 10 ne'ebé aprova ona iha loron-tersa ne'e hosi governante luzófonu sira, ne'ebé halibur iha loron-tersa iha Brazília.

Governante sira desidi mós "insentiva koperasaun tékniku, iha ámbitu CPLP nian, iha área sira infraestrutura kualidade nian, metrolojia, avaliasaun hosi konformidade, akreditasaun, nune'e mós iha superasaun hosi limiti tékniku sira ba komérsiu".

Membru sira hosi bloku luzófonu deklara ona nia apoiu ba realizasaun hosi semináriu ida kona-ba "Zona sira Prosesamentu hosi Esportasaun no rejimi konjénere sira hosi nasaun sira CPLP nian, hodi fahe esperiénsia kona-ba tema no estimula atrasaun hosi investimentu sira ba implantasaun hosi projetu industrial sira", nune'e mós halibur "esforsu sira hodi harii 'website' ida ba divulgasaun" hosi zona sira ne'e.

Aleinde ne'e, nasaun sira hakarak promove "diálogu kona-ba Indikasaun Jeográfiku sira, iha ámbitu CPLP nian", no estimula partisipasaun hosi Estadu-Membru sira iha Semináriu Internasional datoluk hosi Indikasaun Jeográfiku sira no Marka Koletivu sira, ne'ebé sei hala'o iha semestre daruak tinan 2018 nian iha Brazil.

Sekretariadu-ezekutivu CPLP nian, lidera hosi saun-tomense Maria do Carmo Silveira, iha misaun hodi "identifika mekanizmu sira apoiu finanseiru nian" iha organizmu internasional sira hodi kontinua ho "objetivu sira no asaun sira ne'ebé hato'o" iha reuniaun ne'e.

Estadus-Membru sira tenki transmiti ba sekretariadu-ezekutivu informasaun importante sira ne'ebé permiti konklui serbisu levantamentu hosi "pontu estrutural sira ba koperasaun ekonómiku CPLP nian.

Nasaun luzófonu sira rekoñese "importánsia hosi kriasaun ba ambiente adekuadu ida ba dezenvolvimentu ekonómiku, industrial no sosial, nune'e mós ba inovasaun no ba emprendedorizmu" iha Estadu sira CPLP nian.

Iha enkontru ne'e, Portugal reprezenta hosi sekretáriu Estadu Adjuntu no Komérsiu nian, Paulo Ferreira.

SAPO TL ho Lusa

Sem comentários: