sábado, 18 de maio de 2019

Presiza Dezenvolve Setór Turizmu Hodi Eleva Kreximentu Ekonómiku TL


DILI, 17 maiu 2019 (TATOLI) – Timor-Leste iha rikusoin barak ho nia natureza ne’ebé matak, nune’e hanesan nasaun foun, presiza dezenvolve setór turizmu hodi eleva kreximentu ekonómiku TL nian.

Liuhosi konferénsia internasionál Turizmu Relijiozu, ohin, iha Sentru Konvensaun Dili (CCD-sigla portugés), Embaixadóra Estadu Unidus Amérika (EUA) iha Timor-Leste (TL), Kathleen M. Fitzpatrick, hateten, konferénsia ne’e hatudu katak Estadus Unidus Amérika ho Timor-Leste haree dezenvolvimentu  turizmu hanesan prioridade ba kreximentu ekonómiku.

Diplomata haktuir, elementu xave ida husi EUA nia estratéjia ba rejiaun Indo-Pasífiku maka apoia ekonomia ida ne’ebé ho baze iha merkadu no enkoraja dezenvolvimentu sustentavel. Ho dezenvolvimentu tipu turizmu ida ne’e sei ajuda jornada Timor-Leste nian ba auto sufisiénsia no sei bele rezolve mesak nia dezafiu dezenvolvimentu.

Aleinde USAID nia projetu turizmu ba Ema Hotu, EUA mós apoia TL ba dezenvolvimentu liuhosi dalan seluk. Maske ida ne’e la’ós parte ida hosi Forum Illa Pasífiku, maibé TL parte ida hosi programa Interkámbiu Profisionál Turizmu Illa Pasífiku.

Iha 2017, Ministériu Negósiu Estranjeiru EUA ho East West X Centre iha Hawaii, programa ida ne’e fó apoiu ba dezenvolvimentu ekonómiku liuhosi hadi’ak kapasidade profisionál turizmu timoroan sira ne’ebé servisu iha setór públiku, privadu no organizasaun sosiedade sivíl.

Embaixadóra  Kathleen salienta tan, durante TL seidauk sai membru plena ASEAN nian, TL sai ona parte ida hosi Young Southeast Asian Leaders Initiative (YSEALI), programa importante Governu EUA nian ba lider joven sira iha rejiaun ne’e. Joven timoroan besik rihun ida partisipa ona iha programa ne’e no hanesan mós joven nasaun viziñu sira, ne’ebé hatudu interese forte ba dezenvolvimentu turizmu.

Realidade maka membru YSEALI timoroan na’in rua halo viajen ba Laos iha Marsu 2019 hodi partisipa iha semináriu rejionál kona-ba sustentabilidade eko-turizmu. Hafoin fila husi semináriu ne’e, sira fahe sira nia matenek no esperiénsia ba timoroan rihun resin iha TL liuhosi kampaña média sosiál durante fulan rua hodi promove prátika emprezariál ne’ebé ho responsabilidade sosiál.

Jornalista: Zezito Silva | Editór: Francisco Simões

Imajen: Embaixadóra Estadus Unidus Amerika, Kathleen M. Fitzpatrick. Imajen/Egas Cristovão

Sem comentários: