DILI, 17 maui 2019 (TATOLI) - Ministru
Defeza no Ministru Interiór Interinu, Filomeno da Paixão de Jesus, husu ba
Ministériu Justisa atu tetu didi’ak desizaun sosa pistola ba Polícia Ciêntífica
de Investigação Criminal (PCIC).
Tuir opiniaun hosi Ministru
Defeza Filomeno katak seidauk iha nesesáriu atu sosa pistola ba PCIC, tanba
tenki tetu didi’ak desizaun hotu haree ba situasaun jerál iha Timor-Leste liga
ba defeza no siguransa rai laran.
Nia dehan, iha situasaun
Timor-Leste agora dalaruma oknum membru Polísia Nasionál Timor-Leste (PNTL)
inklui FALINTIL-Forsa Defeza Timor-Leste (F-FDTL) balun ne’ebé treinadu no iha
dixiplina maka’as, maibé monu ba tentasaun aat, ikus mai lori pistola ka kilat
la dixiplina hodi tiru tún sa’e fali iha povu nia leet.
“Ha’u mós preokupadu. Forsa
dalaruma halo azineira. Polísia mós halo azineira. Ba tan ema sivíl entaun nia cowboy tiha
de’it ona. Tan ne’e, ita apela ba Ministru Justisa atu haree kuidadu teb-tebes
para proposta ne’e sa’e mai ba Konsellu Ministru no órgaun Estadu sira seluk
ita tetu didi’ak atu fó kilat,” tenik Filomeno ba Agência Tatoli iha edifísiu
Ministériu Defeza, Fatuhada, Dili, ohin.
Nia hatutan, haree ba situasaun
Timor-Leste tuir Konstituisaun RDTL artigu 146 no artigu 144 fó kompetensia ba
F-FDTL no PNTL atu garantia estabilidade nasionál.
“Ha’u hanoin iha ita-nia
konstituisaun hateten ona katak só F-FDTL no PNTL mak bele kaer kilat. Agora
PCIC la hanesan ho Polísia Nasionál Serbisu Investigasaun Kriminál (PNSIK) PNTL
nian. Nia (PNSIK) iha nível aas haree ba krime sofistifikadu (krime avansadu),”
nia esplika.
Ministru mós husu ba Governu
Timor-Leste atu hatúr didi’ak kna’ar PCIC tuir lei hodi haree liu-ba serbisu
saida maka nia bele halo atu reforsa Ministériu Públiku no serbisu ne’ebé iha
ligasaun ho krime organizadu no krime komplikadu di’ak liuhosi PNSIK mak ba
investiga de’it, tanba PNSIK iha rekursu sufisiente.
“Se krime balun ne’ebé
sofistifikadu liu, di’ak liu husu PNSIK ba investiga, tanba sira iha ekipamentu
kompletu no sira iha rekursu umanu kompletu,” governante ne’e sujere.
Ministru Paixão husu atu
Ministériu Públiku no Ministériu Justisa atu haree natureza serbisu saida maka
PCIC bele halo hodi organiza serbisu labele soke malu fali ho serbisu PNSIK
nian.
Jornalista: Eugénio Pereira | Editór:
Xisto Freitas
Imajen: Ministru Defeza, Filomeno
da Paixão de Jesus. Imajen/António Gonçalves
Sem comentários:
Enviar um comentário