DILI, 13 agostu 2020 (TATOLI) -- Prezidente
Conselho de Imprensa (CI), Virgílio da Silva Guterres, informa Conselho de
Imprensa simu ona karta protesta hosi Asosiasaun Na’in ba Mídia (ANM) ne’ebé
husu esplikasaun ba CI ninia fleksibilidade hanesan fó ba Asosiasaun Jornalista
Timor Lorosa’e (AJTL) no Timor Leste Press Union (TLPU) hodi halo konferénsia
ba hili reprezentante na’in ba mídia iha Conselho de Imprensa.
“Ami simu ona karta ida hosi
Asosiasaun Na’in ba Mídia (ANM) no iha laran sira husu esplikasaun, sira husu
fleksibilidade hosi Konsellu Imprensa (CI) ninia hanesan fó ba asosiasaun rua
(2) hanesan Asosiasaun Jornalista Timor Lorosa’e (AJTL) no Timor Leste Press
Union (TLPU) tanba bazeia ba aspirasaun hosi organizasaun rua ne’e hodi halo
konferénsia ba hili reprezentante na’in ba mídia iha Conselho de Imprensa,”
dehan Prezidente Conselho de Imprensa (CI), Virgílio da Silva Guterres, ba
Agência TATOLI iha nia knaar fatin, Kinta-Boot, Dili, foin lalais ne’e.
Prezidente CI haktuir, Conselho
de Imprensa esplika ba na’in ba mídia sira katak fleksibilidade ne’ebé mak
AJTL-TLPU ne’e bazeia ba aspirasaun ne’ebé mak mosu hosi organizasaun rua ne’e,
atu akomoda membru barak liu hosi órgaun Komunikasaun Sosiál sira ne’ebé mak
sei hetan karteira profisionál. Entaun, tuir nia, ida-ne’e mak Conselho de
Imprensa konkorda no konkordansia ne’e tau iha regulamentu no regulamentu ne’e
públika iha jornál repúblika.
Ba Asosiaun Na’in ba Mídia sira,
nia hateten, sira hakarak husu atu sira mós sai na’in ba konferénsia atu hili
sira-nia reprezentante ne’e, Conselho de Imprensa konkorda maibé ho kondisaun
katak na’in ba mídia tenke akomoda órgaun komunikasaun sosiál sira hotu ne’ebé
mak rejista ona iha Conselho de Imprensa.
“Maibé, buat ne’ebé mak ANM
hateten maka kondisaun sira na’in-lima (5) ka membru na’in-lima (5) hanesan
STL, Timor Post, Diário Nacional, Independente, no Dili Post. Sira ne’ebé mak
hetan votu ba direitu mak sira ne’ebé mak eziste ona tinan lima (5) ba leten
mak bele kandidata-aan ba membru Conselho de Imprensa ninian. Buat ne’ebé ké CI
labele konkorda no ami mós nafatin respeita estatutu ANM internál ninian. CI
labele konkorda tanba konkordánsia ida-ne’e bele viola órgaun Komunikasaun
Sosiál sira seluk ne’ebé ké bele besik 10-resin ne’eé la partisipa ka bele
dehan laiha direitu atu ba vota,” Virgílio hateten.
Tanba ne’e, nia informa,
Asosiasaun Na’in ba Mídia haruka karta protesta hodi protesta Conselho de
Imprensa (CI) maibé ida-ne’e liberdade tanba fleksibilidade ne’ebé haraik ba
Asosiasaun Na’in ba Mídia tenke akomoda ema barak.
“Ami-nia kondisaun mak ne’e. Buat
fleksibilidade haraik ba asosiasaun rua ne’e ho objetivu mak atu akomoda ema
barak. Agora fleksibilidade atu haraik ba ANM mós tenke akomoda ema barak,
la’ós atu esklui fali ema seluk maibé mídia boot na’in-lima (5) mak iha direitu
atu vota no kandidata-aan sai reprezenta mídia na’in iha Conselho de Imprensa,”
nia hatete.
La’ós ida-ne’e de’it, Prezidente
Conselho de Imprensa ne’e informa, iha tan segundu karta protesta hosi
Asosiasaun Na’in ba Mídia (ANM) maibé parte hosi Conselho de Imprensa seidauk
resposta no sei iha plenária tanba sei deskuta hela.
Ba Conselho de Imprensa, nia
dehan, konferensia atu hili reprezentante na’in ba mídia iha Conselho de
Imprensa ne’e, órgaun Komunikasaun Sosiál liuliu órgaun Komunikasaun Sosiál
sira ne’ebé mak rejista ona no nia naran tama ona iha lista Conselho de
Imprensa nian ne’e, sira ne’e mka iha direitu atu vota no kandidata-aan.
Maibé, Prezidente CI ne’e
hateten, karta protesta hosi Asosiasaun Na’in ba Mídia (ANM) ne’e haktuir
órgaun komunikasaun sosiál sira ne’ebé mak eziste tinan lima (5) ba leten mak
iha direitu atu vota no kandidata-an maibé iha lei la hatete hanesan ne’e.
“Ita labele halo tuir estatutu
internal Asosiasaun Na’in ba Mídia ninian. Ami respeita maibé CI labele hakruuk
ba regra interna organizasaun ida-nian hodi viola fali organizasaun sira seluk
nian,” nia dehan.
Jornalista: Osória Marques |
Editór: Cancio Ximenes
Notísia Relevante:
Sem comentários:
Enviar um comentário