Kazu droga, MP alega pena prizaun tinan15 ba arguidu JGB

DILI, 04 agostu 2020 (TATOLI) -- Ministériu Públiku (MP) liuhosi Prokuradór titular Luis Hernánio Rangel, iha nia alegasaun husu ba Tribunál Distritál Dili (TDD) atu aplika pena prizaun efetivu tinan-15 ba arguidu JGB ne’ebé deskonfia komete krime prátika tráfiku droga no atividade ilísitu ne’ebé antes ne’e haruka kazál timoroan lori Pill Ecstasy sai hosi territóriu Timor-Leste liuhosi Motain-Indonézia iha 2019.

Liuhosi audiénsia julgamentu ne’ebé prezide husi juis koletivu Zulmira Auxiladora, João Ribeiro, Argentino Nunes, MP husu atu aplika pena ne’e tanba iha produsaun prova no aktu maske arguidu ho hili dalan nonook iha julgamentu sira liu ba.

MP entende katak arguidu prienxe krime tanba simu duni sasán husi Afrikanu ida ho inisiál VCO depois haruka fila-fali ba Indonézia.

Prokuradór titular Luis Hernánio Rangel hateten, kona-ba prova printer haruka husi li’ur mai la liuhusi Indonézia, maibé to’o tiha Timor-Leste mak haruka sai fali, mezmu kompañia JVK rasik nia ‘cabang’ iha Indonézia, tanbasá la direita, nune’e mosu indísiu sasán ilísitu droga ne’ebé perigu ba fó ameasa ba nasaun.

Tuir entendimentu MP nian prienxe elementu krime hodi kondena arguidu JGB, hanesan autoria materiál ba pratika krime-rua (2), Tráfiku no atividade ilísitu no tuir artigu 7 númeru 1 no krime Asosiasaun Kriminoza P no P tuir artigu 10 númeru 1, hosi lei númeru 2/2017, kona-ba kombate Tráfiku Ilísitu, ho forma konsumada, ho nia agravasaun tuir artigu 9 alínea E, K husi lei ne’ebé mak hanesan.

Hosi krime rua ne’e ninia agravasaun pena tinan-10 to’o tinan-15. Nune’e MP husu tribunál koletivu atu aplika pena prizaun efetivu tinan-15 ba arguidu. MP mós husu Tribunál atu aplika pena expulsaun iha artigu 87, katak sidadaun estranjeiru ne’ebé hetan kondenasaun tanba prátika krime ne’ebé fó fatin prizaun aas liu tinan-tolu (3) no seidauk hela iha Timor-Leste tinan-15 bele hetan expulsaun hosi territóriu nasionál, inklui taka atividade ne’ebé nia hala’o.

Tuir aktu ne’ebé arrola hosi Ministériu Públiku katak, iha loron 29 fulan maiu 2019, Polísia Investigasaun Nasionál Narkótika nian simu, informasaun (via WhatsApp) husi POLRI iha Atambua Motain, iha loron ne’ebá maizumenus iha oras 15h30 katak, POLRI detein ona kazál timoroan iha Motain ne’ebé mak pertensia ba territóriu Indonézia nian tanba lori droga ho tipu Ecstasy. Bainhira Polísia Indonézia halo detensaun no pasa revista ba kazál Timoroan deteta katak, sira lori duni Pill Ecstasy husi territóriu Timor-Leste ho nia kuantidade 4.874 Pill ecstasy ho nia modelu ne’ebé maka hanesan, maibé kór maka lahanesan no balun kór matak, azúl no kór kafé.

Bainhira autoridade indonézia halo pasa revista no halo mós inkéritu ba kazál timoroan ne’e, sira deklara katak, arguidu JGB maka haruka sira na’in-rua lori printer (tau droga iha laran) sira ne’e ba Indonézia.

Bainhira autoridade polísia Timor-Leste hatene ona katak, arguidu JGB iha hela Timor-Leste, nune’e polísia halo kedas detensaun ba arguidu JGB, nune’e iha inkéritu arguidu deklara katak, nia parte mak haruka duni kazál Timoroan ne’e lori (sasán printer) ba Indonézia atu fó ba ema ne’ebé maka nia identifika ona ho númeru telefone Indonézia nian iha Kupang.

Iha faktu hosi MP nian ne’e mós haktuir katak, arguidu hetan sasán droga sira ne’e husi Afrikanu ida hosi Nijéria no naran inisiál VCO, modelu atu transforma sasán sirane’e hosi estranjeiru ho nia destinasaun maka nasaun Indonézia, maibé sasán ilísitu sira ne’e tenke tama lai mai territóriu Timor liuhosi arguidu nia kompañia JVK hafoin maka arguidu haruka fali ba Indonézia liu hosi Kupang.

Arguidu mós haruka ona sasán ba Indonézia ho nia modelu hanesan dala tolu ona no sasán sira-ne’e mai hosi Afrikanu ho inisiál VCO ba arguidu hafoin arguidu transforma fali sasán sira ne’e ba Indonézia.

Arguidu simu sasán paket printer (droga iha laran) ho marka EPSON, iha loron 2 fulan maiu 2019 hosi Afrikanu VCO . Iha loron 2 fulan maiu 2019, arguidu transforma printer (droga) ne’e ba Indonézia liuhosi Motain, Atambua, no ema ne’ebé maka lori mak kazál Timoroan ho inisiál JS no nia kaben.

Timoroan ho inisiál JS servisu hamutuk ho arguidu iha kompañia JVK internasionál, enkuantu JS ho nia kaben hetan ona kondenasaun hosi Tribunál Indonézia, tanba lori sasán ilísitu (dorga/pill ecstasy) ne’ebé maka arguidu JGB maka haruka.

Ho aktu sira ne’e hotu MP konsidera Arguidu halo ho forma livre, deliberada no konsentimentu hatene momoos katak, simu husi ema seluk (rede internasionál ) no haruka ka transfere sasán ilísitu (droga) atu nune’e arguidu bele hetan vantajen husi hahalok ilísitu ne’e, no arguidu halo duni hahalok sira ne’e hanesan meiu ka instrumentu ida ne’ebé mak aptu no adekuadu.

Parte defeza ne’ebé fó asisténsia ba arguidu hateten, ho krime ne’ebé MP imputa ba nia kliente la prienxe prova tanba sasán sira-ne’e tama husi pontu entrada TimorLeste nian no sai husi fronteira halo teste la deteta buat ida hafoin iha area Indonézia mak deteta.

Defeza husu Tribunál atu absolve arguidu hosi krime sira ne’ebé MP imputa. Hafoin rona tiha alegasaun parte sira, Tribunál deside adia fila-fali julgamentu ne’e ba iha loron 21 agostu, tinan ne’e, iha tuku 09:30 Otl, hodi rona leitura desizaun finál. Julgamentu ne’e, arguidu hetan asisténsia legal hosi advogadu privadu Domingos Pinto, José Andrade no Agostinho de Jesus.

TATOLI | Jornalista: Nelson de Sousa | Editór: Francisco Simões | Imajen: Nelson de Sousa