OMS la akonsella loke fali eskola sira iha nasaun sira ho kontájiu aas

Loke fali eskola sira iha nasaun sira ho kontájiu maka'as hosi koronavírus foun "sei piora situasaun" ne'ebé asosiadu ho pandemia COVID-19, aviza iha loron-kuarta ne'e hosi responsável ba programa Emerjénsia Sanitáriu hosi Organizasaun Mundial Saúde (OMS) nian, Michael Ryan.

Hafoin tinan letivu 2019/20 hetan interupsaun parsialmente hosi pandemia, nasaun oioin iha nafatin dúvida kona-ba posibilidade hodi loke fali eskola sira, no Ryan akonsella ona katak medida ne'e bele foti de'it iha fatin sira ne'ebé nível hosi kontájiu nian hanesan ki'ik no iha medida sira hodi hatán ba eventual sira hosi kazu infesaun nian ne'ebé maka mosu iha sala aula sira.

"Ita hotu hakarak atu labarik sira fila fali ba aula sira. Sira ho profesor sira tenki halo ne'e iha ambiente ida seguru", destaka hosi epidemiolojista, iha sesaun ida pergunta ho resposta sira ne'ebé transmiti hosi OMS iha Internet.

Hatán kona-ba posibilidade hosi aman-inan sira hosi labarik sira ho problema sira saúde anterior sira lori sira ba eskola bainhira hahú fali aula sira, Michael Ryan salienta katak ne'e depende hosi planu kontinjénsia sira hosi eskola ida-idak, akonsella konsulta hosi responsável eskolar sira nian.

Profesor sira ho moras krónika sira ka problema saúde sira seluk tenki konsulta sira nia médiku kona-ba prekausaun sira atu bele fila ka la'e ba servisu, hatutan hosi responsável téknika OMS nian ba kombate hasoru COVID-19, Maria Kerkhove.

OMS husu mós ba joven sira hodi asumi "nia responsabilidade sira" iha kontensaun hosi transmisaun hosi koronavírus foun nian.

Michael Ryan lembra ona katak "katuas-ferik sira hanesan kuidadozu tebes hodi proteje aan" bainhira COVID-19 haree dahuluk hanesan moras ida ne'ebé afeta ema katuas-ferik sira ka ema sira ho "problema saúde ruma" no husu kuidadu ne'e ba joven sira.

"Joven sira iha oportunidade boot ida hodi hamenus transmisaun liuhosi sira nia komportamentu. Sira tenki haree ba responsabilidade ne'ebé maka sira iha hosi sentidu ne'e", realsa hosi epidemiolójista.

Iha final Jullu, diretor-jeral OMS nian, Tedros Adhanom Ghebreyesus, alerta ona katak joven sira la'ós hanesan "invensível" no katak, iha nasaun balun, hanesan barak tebes hodi "labele rende".

Responsável etíope husu nune'e ba joven sira atu "foti prekausaun sira hanesan ho ema sira seluk hodi proteje aan hosi vírus no hodi proteje ema sira seluk".

Pandemia COVID-19 halo ona ema rihun 701 resin mate no infeta ona ema millaun 18,5 resin iha nasaun ho teritóriu hamutuk 196, haktuir balansu ida ne'ebé halo hosi ajénsia franseza AFP.

Iha Portugal, mate ona ema na'in 1.740 hosi infetadu ne'ebé konfirmadu hamutuk 51.848, haktuir hosi boletin foun hosi Diresaun-Jeral Saúde portugeza nian.

Sapo TL | Lusa