F-FDTL presta omenajen ba eroi no apoia ai-han ba povu Manufahi

DILI, 10 agostu 2020 (TATOLI) -- Komandu FALINTIL-Forsa Defeza Timor-Leste (FFDTL) ho membru na’in- 450 liuhusi programa “Tour FAINTIL” hala’o vizita no presta omenajen ba eroi sira iha Semitériu Jardin Eroi no Estátua Saudozu Don Boaventura iha Luak-Manufahi.

Serimónia presta omenajen ne’e hala’o direita husi Xefe Estadu Maiór Jenerál F-FDTL, Lere Anan Timor akompaña husi Administradór Munisípiu Manufahi no Komandante Polísia Munisipiu Manufahi hodi selebra aniversáriu FALINTIL ba dala-45 (20 agostu 1975-20 agostu 2020).

Xefe Estadu Maiór Jenerál Lere Anan Timor deklara, sira-nia parte vizita no presta omenajen ba Saudozu Don Boaventura no eroi Manufahi ne’ebé mate ba rai ne’e hodi hanoin hikas saudozu sira-nia luta kontra okupasaun Governu Portugés no Indonézia hodi lori Timor-Leste hetan independénsia.

“Vizita ne’e mai atu fó valór ba ita nia eroi sira hanesan, Don Boaventura ninia istória no eroi sira ne’ebé uluk mate ba rai ne’e, tanba ne’e iha dia 20 agostu, la’ós atu relembra de’it FALINTIL nia luta, maibé mós relembra mós asuwa’in Timoroan hotu- hotu nia luta ho hanoin hakarak ukun rasik-an,” dehan Lere Anan Timor ba jornalista iha Jardin Eroi-Manufahi.

Lere hatutan, selebra tinan-45 ba ezisténsia FALINTL ba tinan-ne’e selebra ho eventu úniku la’o hale’u munisípiu-12 hodi fó hanoin hikas ba membru sira atu hatudu nafatin sira-nia profisionalizmu defende estadu no povu tuir lei hodi lori nasaun ne’e moris hakmatek.

Durante vizita Manufahi, Komandante F-FDTL, Lere Anan Timor ho ekipa Tour FALINTIL fó apoiu mós ai-han ba povu kbiit-laek hamutuk ema na’in-40 ne’ebé ekipa no autoridade sira identifika ona.

Lere husu ba povu atu labele haree valór ai-han ne’ebé Komandu F-FDTL oferese ne’e ki’ik, maibé apoiu nu’udar jestu domin boot ida atu tulun povu bele konsumu netik aihan, tanba uluk iha funu tinan-24, povu maka oferese hahán ba FALINTIL iha ai-laran too vila-laran.

Iha parte seluk, Administradór Munisípiu Manufahi, Arantes Isaac Sarmento hato’o agradese ba vizita Komandu F-FDTL hodi fó apoiu ba povu kbiit-laek sira no presta omenajen ba eroi sira ne’ebé mate ba nasaun ne’e.

Administradór Arantes espera ho tinan-45 Komandu F-FDTL bele kontribui nafatin paz iha Timor-Leste.

Jornalista: Eugénio Pereira | Editór: Francisco Simões

Notísia Relevante: Tour FALINTIL refleta istória FALINTIL