DILI, STLTIMORLESTE.com – Forum Komunikasaun Feto Timor Leste (FOKUPERS) halao kamapanha ativizmu hodi luta kontra violensia hasoru feto, tanba nee hotu-hotu hamutuk halo mudansa ba violensia hasoru feto no labarik feto iha sosiedade.
“Ita haree aktu violensia ba feto kontinua buras iha ita nia rain Timor Leste, hanesan okupasaun hotu neebe kanek sira seidauk maran hotu, kanek barak seluk kontinua mosu tan, nunee halo akompanha ativizmu nee, hodi luta kontra violensia hasoru feto no labarik sai vitima ba violensia oin-oin,” dehan Porta voz, Lucia Fatima da Silva liu husi konferensia imprensa neebe halao iha Farol, Dili, Kuarta (27/11/2024).
Tanba tuir nia bazeia ba relatoriu Chega rejista feto liu atus ualu (800) hetan ona violasaun seksual, durante tempu okupasaun iha tinan 1975-1999, hafoin ukun aan, maibe situasaun violensia sei kontinua hafalun feto no labarik feto nia moris.
Violensia neebe mosu iha Timor Leste kuaze 33% feto ho idade 15-49, esperiensia ona violensia husi sira nia parseiru moris, nee signifika feto nain 1 entre nain 3 hetan violensia iha nia moris.
No violensia nee laos deit akontese ba feto adultu, maibe feto hasoru violensia hahu kedas husi bainhira sei labarik, nunee bazei ba dadus husi DHS hatudu mos 66% feto hetan ona esperiénsia abuzu fiziku no 24% feto hetan esperiénsia abuzu seksual bainhira sei labarik.
Iha parte ketak, Prezidente Board FOKUPERS, Maria Domingas Fernandes Alves dehan, organizasaun fornesedor servisu asistensia ba feto no labarik feto sira, inklui polisia VPU Loron-loron simu keixa, fo asistensia ba feto no labarik feto sira neebe sai vitima ba violensia bazeia ba jeneru.
Tanba iha tinan 5 nia laran, Fokupers rejista total kazu 557 violensia domestika hasoru fen no 301 kazu violensia seksual hasoru feto no labarik feto, no durante tinan 5 nee nia laran, Feto nain 5 mate, tanba violensia domestika.
Entretantu Diretora Ezekutiva FOKUPERS, Domingas Afonco Amaral esplika, husi meiu halo kampanha ativizmu hodi luta kontra violensia hasoru feto no labarik feto, Fokupers bolu nafatin ema hotu-hotu nia atensaun atu bele hamutuk halo mudansa ba Timor Leste ida neebe hakribi violensia hasoru feto no labarik feto.
(EST 1)
Suara Timor Lorosae | Imagem: Fokupers
Sem comentários:
Enviar um comentário