Ema 65 Iha Baukau Hetan HIV-SIDA

BAUKAU, STLTIMORLESTE.com

 – Ema nain 65 iha Munisipiu Baukau hetan transmisaun Human Immunodeficiency Virus-Acquired Immune Deficiency Syndrome (HIV-SIDA).

“HIV ita iha dadus hamutuk 65, kompostu husi feto 22 mane 43, sira nee maioria idade reprodutivu husi idade 25 too 44,” informa Diretor Servisu Saude Munisipiu Baukau, Cristiano Cipriano Belo ba jornalista sira iha Bukoli, hafoin realiza seminariu transmisaun HIV-SIDA, Sesta (29/11/2024).

Cristiano sublina, kazu refere rejistu husi 2008 too 2024 iha nivel Postu Administrativu 6, neebe barak liu iha Postu Baukau Vila, tanba husi Suku 11 barak liu mak Suku Bukoli, neebe konsege rejistu hamutuk nain 10 kompostu feto mane kuaze idade reprodutivu iha 2023 no 2024.

Nia fundamenta, kazu refere rejistu, tanba liu husi esforsu Ministeriu Saude nian orienta pesoal saude no parseiru servisu sira, halo kampanha tama sai uma hodi hasae sidadaun sira nia konhesimentu hakbesik aan iha fasilidade saude halo teste raan ba estatus HIV-SIDA.

Tanba konsidera virus refere alastra ona iha Munisipiu 13 inklui Munisipiu Baukau neebe rejistu ho numeru aas nunee presiza prevene, tanba virus refere fo ameasa ba mundu, maibe laiha aimoruk atu kombate.

Bainhira pasiente HIV-SIDA la marka prezenza iha fasilidade saude simu aimoruk hodi preve virus refere, pesoal saude sira iha dever obrigasaun fo apoiu aimoruk too iha pasiente nia hela fatin, la profesional saude halo diskriminasaun ba sidadaun hotu, hakarak fo tratamentu saude hanesan.

Entretantu husi dadus afetadu HIV-SIDA 65 nain 29 lakon ona vida no restu kontinua halo tratamentu rutina.

(EST 2) -- Suara Timor Lorosae(STL)