BAUKAU, STLTIMORLESTE.com – FALINTIL – Forsa Defeza Timor Leste (F-FDTL) komemora loron aniversáriu Komponente Terrestre ba dala 22.
“Aniversáriu Komponente Terrestre ba dala 22 nian, neebe onra espesial no haksolok, neon ba Militar sira hotu neebe servi iha komponente boot ida nee nia mahon,” hatete Xefe Estadu Maior Jenerál F-FDTL, Tenente Jenerál, Domingos Raul “Falur Rate Laek” ba jornalista sira iha iha Komponente Terrestre F-FDTL Baukau, Sesta (13/12/2024).
Nia esplika, ho selebrasaun anual loron Komponente Terestre nian ba dala 22, hanoin hikas ho konsiensia ilustre pasadu neebe buka atu fo onra husi loron ba loron, hodi espresa nia agradesimentu klean ba ezemplu abnegasaun no dedikasaun husi jerasaun sira neebe antes no sira neebe kumpre sira nia misaun iha tempu no kondisaun sira neebe susar.
Nia fo saudasaun espesial ba Eis Komandante FALINTIL sira, no komandante sira seluk neebe prezente iha nee, no liu husi sira hotu neebe iha sira nia Komando nia okos hatene fo sira nia aan tomak ba servisu, dala barak ho sakrifisiu ba sira nia vida rasik.
“Iha loron ida nee ita nia dever atu hanoin sira, tanba sira hotu merese ita nia afetu no rekonhesimentu ba dalan ezemplar neebe sira kumpre sira nia dever. Aleinde militar sira husi Komponente Terrestre neebe hanesan hau temi ona, fo vizibilidade boot ba servisu neebe ita halao loron-loron, sira seluk, ho numeru boot, mantein iha estrutura forsa iha territóriu nasional, prontu atu envolve iha operasaun militar sira iha kualker tempu, bainhira no iha neebe interese nasional ezije ka seguransa ba ita nia maluk sidadaun sira ezije,” nia esplika.
Iha fatin hanesan, Ministru Defeza (MD), Donaciano do Rosário da Costa Gomes “Pedro Klamar Fuik’ deklara, Ministeriu Defeza prizide no apela ba Militar foun sira atu bele tuir nafatin ezemplu neebe mak militar tuan sira neebe forma komponente terrestre neebe mai kedas ho fileiras FALINTIL.
(jen) - Suara Timor Lorosae(STL) | Imaje: FALINTIL - Forsa Defeza Timor Leste (F-FDTL) komemora loron aniversáriu Komponente Terrestre ba dala 22. (Foto: STL/Jeniche da Costa)
Sem comentários:
Enviar um comentário