DILI, STLTIMORLESTE.com – Prezidente Republika (PR) Jose Ramos Horta realiza konsertu piano iha palasiu Prezidensial, hodi hasae no hatudu talentu foinsae sira nian.
Prezidente Republika Jose Ramos Horta sai uma nain ba konsertu pianu istoriku neebe hatudu talentu muzikal foinsae extraordinariu, selebra tantu patrimoniu kultural Timor Leste nian no ninia futuru.
Konsertu nee aprezenta pianista foinsae extraordinariu nain rua Abílio António de Araújo ho tinan 14, talentu deskonhesidu internasionalmente neebe konhesidu ho nia interpretasaun ba Mozart, Chopin no Beethoven, aprezenta hamutuk ho nia alin Afonso Rufino Abílio de Araújo ho tinan 7neebe hetan ona rekonhesimentu iha kompetisaun muzika klasika rejional sira.
Iha Segunda kalan (23/12/2024) hatudu kombinasaun uniku husi atuasaun klasika no tradisional sira. Ho diresaun husi Maestrina Lídia da Costa, iha konsertu kalan nee aprezenta Djitron Pah, embaixador prinsipal ida husi muzika tradisionl Timór Osidental nian no mestre konhesidu ba sasandu, Koru istoriku Santa Cecília, neebe sai parte integrante husi panorama kultural Timor Leste nian dezde tinan 1945, no Orkestra Juventude Dom Bosco neebe harii iha tinan 2021 ho Maestro Padre Adérito Manuel.
Iha biban nee, Prezidente Ramos-Horta liu husi nia diskursu hatete, ho muzika bele ultarapasa fronteira no halihur jerasaun sira hodi aprezenta talentu neebe mak sira iha.
“Muzika ultrapasa fronteira sira, halibur jerasaun sira, no revela ita nia nasaun nia klamar, Selebrasaun muzikal ida nee kona-ba kriatividade, dedikasaun no talentu reprezenta liu konsertu, ida nee mak testamunha ida ba ita nia nasaun nia reziliensia kultural no futuru nabilan neebe ita nia jerasaun foun reprezenta,” Katak PR Horta.
Nia dehan, konsertu nee hatudu profundidade no diversidade husi talentu muzikal nasaun nian. Ida nee sai hanesan plataforma ida ba interkambiu kultural no dialogu interjerasional liu husi linguajen universal muzika nian.
Bainhira remata aprezenta konsertu piano iha palasiu Prezidensial, Prezidente Republika Jose Ramos Horta mos fahe sertifikadu rekonhesimentu ba foinsae sira neebe aprezenta konsertu pianu no hahu iha eventu nee.
Iha eventu importante nee mak prezensa mos husi Abilio Aroujo ho nia espoza, korpu dipolmatiku, membru Governu, membru Parlamentu Nasional nomos koru husi santa Cecilia no aprezentasaun ba konsertu pianu no seluk tan.
(eme) - Suara Timor Lorosae(STL)
Sem comentários:
Enviar um comentário