CCT SEI LOKE FABRIKA TRIGU

Diretur Kompañia Coperativa Cafe Timor (CCT), Sisto Moniz Piedade informa, iha tempu badak CCT loke fabrika trigu iha Timor Leste hodi kontribui ba dezenvolvimentu.

Itrigu ne’ebe maka sei produs ne’e tuir planu ba dahuluk distribui deit iha teritoriu Timor laran, maibe sei exporta mos ba Indonesia ho Thailandia.

“Ita nia agrikultor mos komesa kuda barak ona ona e ami prepara ona atu halo fabrika Aifarina (Moca-Red) atu halo itrigu iha Timor, Hau hanoin fulan ida rua e ne’e ami komesa halo ona. Primeiru ita koko tok iha rai laran, e ami mos hanoin atu halo exportasaun trigu ba rai liur,”deklara diretur Kompañia CCT, Sisto Moniz Piedade ba JN-Diario Tersa (19/5) iha ninia knar fatin Lecidere-Dili.

Nia dehan Kompañia refere iha tinan tolu kotuk to’o ohin loron CCT sosa aifarina husi povu agrikultor barak tiha ona hodi prepara halo trigu.

Diretur CCT ne’e fo sai katak, trabalhadores ne’ebe maka atu servisu iha fabrika ne’e komesa preparadu tiha ona kuaze nain 15, maibe ba oin fabrika lao ona sei aumenta tan trabalhadores.

Nia hatutan, aifarina ne’ebe atu halo trigu ne’e sosa husi Minicipiu Covalima, Manufahi, Maliana, Viqueque, Lospalos no Baucau.

“Tinan ida ne’e ami sei hola makas iha Viqueque ho Lospalos. Ami sosa aifarina tinan 3 ona tau hamutuk, tantu iha tinan kotuk ami sosa besik 2 mil toneladas,”haklaken diretur CCT.

Nia informa liu tan katak, CCT mos durante ne’e exporta mos vanila, Cengkeh, pimenta Timor ba Europa, maibe produsaun ne’ebe refere sei minimu liu.

“Ita nia pimenta sae ba Laulara (Aileu-Red) ne’e halo exportasaun hanesan Europa ami haruka hotu ba fabrika mas oituan . Hanesan vanile ita Timor hetan maran ne’e la to’o tonelada ida, tinan kotuk ne’e 5 toneladas deit,”espelika nia.

Nia dehan pimenta ohin loron iha deit Municipiu Aileu, maibe tuir planu CCT sei halao programa kuda pimenta inklui Cengkeh iha Lospalos no Viqueque no sei identifika mos fatin seluk hodi bele kuda.

Diretur CCT Sisto Monis Piedade reafirma liu tan katak, tinan oin CCT sei kuda mos kakau iha parte Leste para nune’e ba futuru TL bele exporta ba rai liur.

“Ami mos iha programa iha parte Leste komesa tinan oin ami komesa kuda kafe rabusta iha Lospalos, Baucau e Viqueque. Depois kakau mos ami komesa kuda iha Municipiu hotu tanba ne’e ho hanoin iha futuru ne’e depois de kafe ita bele halo exportasuan kakau, tanba kakau ne’e potensial iha ita nia rai laran,”afirma nia.

CCT halo exportasaun barak liu ba rai liur maka kafe Timor, maibe CCT sei halo esforsu tomak atu exporta mos produsaun sira seluk hanesan kakau, pimenta, vanila no seluk tan. alf

Jornal Nacional