GOVERNU SEI LA TOLERA TRANSPORTE PUBLIKU “NAKAR”

Vise Ministru Telekomunikasaun, Inacio Freitas Moreira deklara, iha tempu badak Governu sei fo sai tabela presu transporte públiku, hodi halakon transporte públiku ne’ebé nia nain gosta kontra.

“Tabela ba tarifa sira ne’e prontu hotu tiha ona agora hein atu publika deit. Tenke kumpri, transportes publikus ida ne’ebe maka la kumpri demais liu konserteza que ninia lisensa ne’e sei hasai. Ne’e Estado, ita labele halimar ho Estado,”deklara Vice Ministru Inacio Freitas Moreira ba JN-Diário Kinta (21/5) iha ninia knar fatin Caicoli-Dili.

Maske nune’e parte la fo sai tabela presu ne’ebe maka sei aplika ne’e, tanba dirasaun Transporte Terrestre maka sei fo sai konaba tabela transporte publiku nian nee.

Nia informa liu tan katak, tabela ba presu transporte publiku ne’e laos deit implementa ba transporte publiku, maibe aplika iha teritoriu Timor laran tomak.

“Ida ne’e ba Municipiu hotu laos Dili laran deit,”Vice Ministru Transporte e Komunikasoes, Inacio Freitas Moreira fo sai.

Servisu Trankadu 100 Dias Konsege Hadia

Iha oportunidade ne’e, Vice Ministru Telekomunikasaun, Inacio Freitas Moreira afirma 1oo dias Sestu Governu Konstitusional ne’ebe hasoru difikuldades barak, tanba servisu lao la tuir sistema nune’e lao trankadu, maibe konsege hadia ona servisu barak iha 100 nia laran ne’e.

“Hau hanoin iha esforsu lubuk ida maka ami halo depois de remodelasaun ne’e mai iha duni servisu balu ne’ebe ladun diak tanba sai fali husi sistema. Maibe depois ami halo diak tiha, agora lao diak tiha ona e ita hanoin buat hotu diak lao ba oin. Ba oin Hau hanoin tenke halo planu halo didiak e planu ne’ebe iha tiha ona ne’e tenke asegura para halo nafatin ba oin”dehan Inacio Moreira

Nia hatutan tinan fiskal oin mai konserteza que planu ita persiza halo tinan oin ho orsamentu ne’ebe aloka tenke halo diak liu tan para depois ninia alokasaun ho implementasaun ho ejekusaun ne’e tenke ho kualidade diak.

Iha inisiu kedas sestu Governu hatete kedas atu halo servisu ida ho durasaun 100 dias ne’ebe dia 27 semana oin mai halo 100 dias, maibe ralatoriu hatama tiha ona.

“Ohin (horseik-Red)Hau reuni ho diretores husi deit transporte komunikasoens ninian ami koalia konaba atividades hotu-hotu ne’ebe halo iha 100 dias nia laran. Servisu barak maka uluk sira la halo hotu Hau mai kuaze halo hotu ida maka hadia sistema atendimentu transportes terrestre ninian, rejistu de veiklus, inspesoens ba kareta ninian ho tratamentu karta de kondusaun ne’ebe muda tiha ona ba Hera ida ne’e ami halo tiha ona,”dehan nia Iha espelikasaun Vice Ministru Inacio Moreira, durante 100 dias ne’e konsege hadia Portuariu no muda hotu kareta tau iha patrimoniu Estado nian.

“Servisu portuariu sira iha ne’eba ne’e uluk ne’e iha konfuzaun tanba Ró sira ne’e ida-idak hadau malu mai halo deskaregamentu, maibe depois ami halo desizaun tenki tuir planu ajentis servisu portuariu sira nian agora kumpri. Seluk maka kareta ne’ebe uluk prende iha tinan tolu ba kotuk para hela ne’e komesa horseik sira lalin sai ona para hotu iha area patrimonu Estado ninian iha Balide. Servisu seluk ne’ebe maka ami hadia maka trai port ne’ebe halo iha Tasi-Tolu ne’eba komesa 27 agora halo ona transportasaun ba iha kontitor sira e sei dada 24 oras ne’e ninia prosesu halo hotu ona,”informa Inacio Moreira.

Nune’e mos iha 100 dias nia laran hadia mos kondisaun Aeroportu Dili ne’ebe at inklui halo mos regras ida konaba barajen kareta ninian.

“Aeroportu ninian hanesan roundway ne’ebe kuak ami hadia hotu tiha ona, lolos labele kuak tanba foin dadauk iha tinan kotuk maka halo rehabilitasaun, mas ami hadia ona. Tantu ekstreis ne’ebe maka at e durante ne’e la halo manutensaun ami haruka halo ona e ektre ida que sosa tau iha ne’eba tinan 3 iha ne’eba ami komesa atu monta ona atu nune’e uja ona. No mos barajen ba kareta sira ne’e ami halo ona despaixo ida para atu labele para ho sorin, maibe hotu-hotu tenke para tuir estrada ami halo ona kordenasaun ho komadante Polisia tranzito,”fo sai vice Ministru ne’e.

Tantu iha 100 diak ne’e vice prepara dekretu lei konaba buka reseitas iha Estado liu husi autoridade komunikasoes ninia inklui prosesu hadia Ro Nakroman lao ona e fulan hirak oin mai bele halo operasaun. alf

Jornal Nacional