TIMOR-LESTE KONSEGE HAMETIN PAZ NO ESTABILIDADE

Sekretariu Jeral Partidu FRETILIN, nu’udar mós Prezidente Zona Especiais Ecónomia Social Mercado (ZEESM) Oecusse, Mari Alkatiri, hatete, Timor Leste (TL) restaura Independensia ba dala XIII konsege hametin paz no estabilidade.

“Tinan sanulu resin, ita hatene ona Timor-Leste konsege hametin paz no estabilidade iha ita nia rai, ne’e fator importante ida para lori dezenvolvimentu ba oin” afirma Mari Alkatiri ba Jornalista sira iha, Comite Central FRETILIN (CCF), Comoro, Tersa (19/05).

Nia friza katak, Timor Leste diferensia tebes ho nasaun balun ne’ebe mak ukun-an kleur ona ne’ebé kontinua iha funu no violensia.

Maske nune’e, Mari Alkatiri, rekoñese iha parte seluk presiza esforsu hodi atinji dezenvolvimentu liu-liu ba setór ekonomia nian.

“Kestaun ekonomia ha’u hanoin la’o ladiak tanba estratejia ekonomia mak ladiak. Osan ne’e bele muda ita nia vida, osan ne’e bele halo ita barukten. Kuandu halo barukten ona ita sei halo buat ida,”Alaktiri hatete.

Iha parte seluk, tuir Dosente Fakuldade Siencia Sociais e Politica (Faspol) hanesan akademista, Antero Bendito, hateten katak, Timor-Leste restaura independensia ba dala XIII ona maibe kresimentu ekonomia sei falsa tanba ohin loron estranjeiru domina iha Timor Leste.

“Progresu ekonomia sei problema, tanba ohin loron fatin fatin China maka nakonu. Se ita nune’e bebeik ita maka sai neokolonialismu (atan) ba estranjeiru,” Antero afirma ba jornalista iha kampus Faspol, Caicoli, Dili, Tersa (19/05).

Atu responde preokupasuan hirak ne’e, nia sujere ba Governu presiza tau atensaun ba setór ekonomia.eby

Jornal Nacional