XANANA APELA JERASAUN FOUN TL-RI HARII INTERESSE NASAUN

Eis Primeiru Ministru Kintu Governu konstitusional, atual Ministru Planeamaentu Investimentu Estratéjiku, Kay Rala Xanana Gusmão, apela ba jerasaun foun sira iha nasaun Timor Leste (TL) ho Republik Indonesia (RI), atu tane metin intrese nasaun rua ne’e nian, no defende soberania Estadu nian.

“Ha’u husu no apela ba sira dehan, iha situasaun faze mundu nian ne’ebé difisil tebes, tanba ema oho malu iha fatin barak iha mundu ne’e, ha’u husu ba joven sira atu harii uluk mak interese nasaun ninian, no intrese defende soberania nasaun ninian,”dehan Xanana Gusmão, iha Aeroportu internasional Nicolau Lobato Comoro, Dili, Tersa (19/5), hafoin interaksaun entre lideransa jerasaun tuan RI ho TL iha Jakarta.

Xanana dehan, iha interaksaun entre nia, BJ Habibie, Tri Sutrisno no Susilo Bambang Yudhoyono ne’e, atu loke joven sira nia hanoin.

Xanana hatutan, interaksaun hanesan ne’e, bele hala’o mós iha Timor Leste ho asuntu seluk. Xanana dehan, nia ho fundador nasaun Timor-Leste, aktual Sekretariu Jeral FRETILIN, Mari Alkatiri mós haree ona buat sira ne’e hotu, maibé sei la’o neneik.

“Ha’u apela ba jovens iha indoneisa ne’eba, ha’u dehan deit katak, dalaruma ita hanoin katak, ukun an ne’e mak hetan deit bandeira, hetan deit Prezidente ida, hetan Parlamentu no buat sira ne’e hotu, I depois ita kopia-kopia buat seluk husi rai liur, hodi ita mak sabraut malu hela deit, ita la la’o ba oin,”katak Xanana.

Nia dehan, tenki diskuti duni hanesan ne’e, maibé laos diskuti dehan katak, se mak atu manan, maibé loke joven sira nia hanoin kona-ba ekonomia, relasaun doadores, seguransa no buat seluk tan.

Xanana relata, nia ho Alkatiri hanoin ona buat sira ne’e, maibé tanba agora dadauk nia ho Alkatiri se okupadu ho servisu Estadu Timor Leste nian, entaun tenki la’o tuir prosesu.

Tanba Xanana hatutan, interaksaun hanesan ne’e, Timor Leste realiza tiha ona, iha fulan hira liu ba hodi konvida professor ida mai husi Singapore, mai koalia kona ba dezenvolvimentu ekonomia Timor Leste nian.

Iha sorin seluk, Dosente Universidade Nacional Timor Lorosa’e, Julio Tomas Pinto mós hatete katak, Tri Sutrisno, Habibie, Susilo Bambang Yudhyono ho Xanana Gusmão enkoraja jerasaun foun sira kona ba oinsa atu hasai nasaun husi dezafius.

Julio Tomas Pinto dehan, diskusaun sira hanesan ne’e importante tebes ba jerasaun foun sira atu foti esperiensia sira ne’e atu sai hanesan prinsipiu moris, atu bele lori nasaun Timor Leste ba oin diak liu tan.tap

Jornal Nacional