TRAIDOR NASAUN LABELE HELA IHA TL

Diretur Tékniku Federasaun Futebol Timor Leste (FFTL), Orlando Mendes Marques, deskonfia komete iha eskândalu iha jogu futebol entre ekipa Malysia kontra TL, la merese sai sidadaun TL, tanba trai nia nasaun rasik tanba deit osan US$ 15 mil.

Jurista no ekonomista ne’e dehan tan, Timor-oan hanesan Orlando ne’e, labele fila fali mai TL ona, tanba nia hahalok ne’e hatu’un dignidade nasaun iha mundu internasional.

“Ema hanesan ne’e labale sai Timor-oan. Hau nia laran taridu kuandu rona buat sira hanesan ne’e. Aktu Timor-oan ne’ebé simu osan US$ 15 mill ne’e, hamo’e povu TL tomak, sira ne’e diak liu lalika mai Timor ona,”dehan Manuel Tilman ba jornalista sira iha nia kna’ar fatin Hotel Beach Garden Dili, Sesta (05/6).

Tuir Tilman, ida ne’e edukasaun husi uma laran mak lato’o atu hatene katak, sasan ninian, ninian duni, no ema nian labele bok.

“Ita ba fa’an an tanba US$ 15 mill ne’e, saida mak ne’e? ita atu ba foti ita nia rai ne’e nia naran ba mundu, maibé ita halo fali hanesan ne’e. Ita nia eis Primeiru Ministru Xanana moras hela mós, tama sai iha Afrika no America ne’eba ne’e, ho Dr. Ramos Horta maske katuas tiha ona mós ba nafatin Nasoens Unidas tanba deit atu lori naran Timor Leste ne’e ba morin iha mundu,”tenik Tilman.

Nune’e mos, osan barak ne’ebé mak TL hatama iha Guinea Bissau, Sudaun do Sul ho Norte, atu TL nia naran ne’e buras nafatin ba oin, para aban bain rua keta TL persija komunidade internasional karik, ema bele tulun.

Alende kazu hanesan Diretur Teknika F-FTL ne’e, iha mos kazu seluk ne’ebe akontese, tanba ne’e husu ba Timor-oan sira ne’ebé durante ne’e trai ona nia rai rasik, tenki arepende ona, promete sei la halo tan no husu deskulpa ba povu.

Iha parte seluk, Ministru Negosius Estranjeirus no Koperasaun (MNEK), Hernani Coelho haktuir, Timor-oan nain rua ne’ebé komete kazu subornu, submete ona ba prosesu investigasaun iha Singapura.

Nia esplika, husi Timor-oan nain rua ne’e, ida se eskola hela iha Indonesia, maibé lahatene tanbasa, nia ba mosu fali iha Singapore hodi hamutuk ho ofisial F-FTL ne’ebé akompaña jogador Timor-oan sira ne’ebé ba joga iha Sea Games ne’e.

“Entaun husi Polisia Singapura, suspeita sira katak, sira involve iha kazu match fixing (suborno). Ne’eduni, Polisia se detein hela sira, no iha hela prosesu de investigasaun, hodi hatene sira halo duni buat ne’e ka la’e,”katak Hernani.

Nia hatutan, kona-ba advogadu Timor-oan nain rua ne’e nian, dadauk ne’e entidades sira ne’ebé responsavel ba área desportu ninian, dadauk ne’e halo esforsu hodi aranja advogadu ida atu lori ba Singapore hodi hare asuntu ida ne’e.

Nia dehan, kazu ne’e Governu liu husi Embaixada Timor Leste nian iha Singapore akompaña hela, hodi hare katak, sira nia tratamentu ne’e tuir normas ne’ebé mak iha.

Hernani dehan, semana oin, kazu ne’e sei lori ba Tribunal Singapura, hodi julga sira atu bele hatene sira ne’e simu duni subornu ka la’e.

Hernani dehan, iha loron 5/6 liu ba, Tribunal Singapura seidauk julga sira, maibé hanesan desizaun ida husi Tribunal hodi fó detensaun ba sira, atu hahu prosesu de investigasaun.

“Kazu ne’e kuandu defaktu los duni, entaun ladiak ba ita nia rai, liu-liu ba ita nia federasaun football, tanba football ne’e la’os iha Governu nia okos, maibé nia imazen iha mundu internasional monu,”afirma Hernani.cos

Jornal Nacional