Falta organizasaun no disiplina iha forsa armada - PM Saun Tomé no Prínsipe nian

Primeiru-ministru sauntomense, Patrice Trovoada, horisehik hatete katak falta organizasaun no disiplina iha forsa armada nasaun nian. 

Patrice Trovoada, ne’ebé halo parte iha primeira jornada reflesaun kona-ba forsa armada sauntomense, ne’ebé sei kompleta tinan 40 iha loron 06 setembru oin mai, hatete katak hosi enkontru ne’e "sei hamosu buat di’ak hodi rekupera imajen ne’ebé la di’ak tanba indisiplina".

Forsa armada sira Saun Tomé no Prínsipe nian "presiza tan lejislasaun no meiu", defende Patrice Trovoada, ne’ebé defende mós nesesidade atu hala’o konsensu ba solusaun relativamente ba promosaun no jestaun hosi meiu finanseiru.

"Ita hotu tenke hanoin ba nasaun no iha sistema seguransa no defeza ne’ebé adekua ho ita-nia realidade", tenik Patrice Trovoada, defende katak "ho espíritu disiplina no diálogu parte hosi problema balun sei hetan avaliasaun".

Xefe Estadu-maior Jenerál (CEMGFA), Horácio Sousa mós defende reflesaun profunda hodi perspetiva "ho rigór no realizmu" futuru forsa armada nian "ho diálogu, konta ho alterasaun ne’ebé mosu iha sosiedade sauntomense no ezijénsia internasionál iha tempu sira ikus ne’e".

"Ita tenke hetan solusaun ba ita-nia frajilidade", konsidera CEMGFA sauntomense, hatutan katak "tenke halakon defeitu" hahú hosi regulamentu no disiplina militár.

SAPO TL ho Lusa