PISTOLA 2 ULUK MM UZA, POLISIA REKOLLA HIKAS

Polisia Nasional Timor Leste (PNTL) Munisipiú Baucau rekola hikas ona pistola rua ne’ebe mak uluk Paulino Gama ‘Mauk Moruk’ (MM) hadau husi membru Polisia nain rua iha eskuadra Laga nian.

Komandante PNTL Munisipiú Baucau Superintendenti Justino Menezes dehan, Polisia rekolla hikas ona Pistola rua, Granada, inklui rama ambon no intrega ona ba parte investigasaun nian hodi bele sai hanesan evidensia.

“Pistola rua ne’ebe mak uluk iha Mauk Moruk nia liman ita rekoila ona no iha ona seksaun investigasaun nia liman hodi sai hanesan evidensia depois mak intrega ba Ministeriu Publiku (MP) hodi prosesa ba oin,” dehan, Justino ba Jornalista iha Kuartel Jeral PNTL, Kaikoli, Kinta (27/08/2015).

Entertantu, kona ba membru MM nian ne’ebe mak sei halai nia dehan, sira ne’e la ho armas ona tanba armas ne’ebe mak uluk sira uza mak oras ne’e rekoila ona, karik sira entaun ida ne’ebe mak sira halo rasik hanesan rakitan.

Nia hatutan, sira nain 6 ne’ebe sedauk kaptura inklui mos Sunardi no Lemorai no seluk seluk tan, husi Bagia nain 2 no Laga nain 4, foin lalais sira nain 16 mak intrega an iha komando PNTL, no grupo ida husi kribas Munisipiú Manatutu hamutuk nain 10 nian mós intrega an hotu ba komando PNTL munisipiu Baucau.

Nia realsa, sira nain 6 ne’e responsabilidade Komando PNTL Munisipiú Baucau nian,sira mak sei uja maneira para sira nain 6 ne’e bele mai intrega an lalais.

“Hau koalia ona ho hau nia lider komunitaria sira, hau nia OPS sira para halo aprosimasaun deit, laiha tan buka hodi kroat, hau nia misaun mak fo aprosimasaun husi dialogu aberta, sosialijasaun ba sira nia familia a mesmo tempo ba xefe suku sira para sira hetan karik bele mai intrega an ba polisia, hau garante 100% kuandu intrega an mai hau la iha insulta no lakona buat ida” Justino garante.

Nia dehan, Sira ne’ebe mak sedauk intrega an laiha ida mak kanek no sira nafatin ho kondisaun diak, ba sira ne’ebe sente tauk no kanek ne’e intrega an hotu ona.

Nia hatutan tan katak, liu husi informasaun husi ema sira nebe iha tereno katak sira iha area Baucau parte laga ninian ao mesmo tempo sira balun iha Baguia nia sorin, sira iha ne’e maibe tamba tauk entaun sira subar deit, maibe Polisia konfersa ona ho sira nia lideransa para hetan sira bele haruka mai.

Nia dehan, maneira diaologu lao nafatin ho komunidade sira, komandante eskuadra ho OPS sira halo nafatin dialogu para sira nebe sente nia familia sei subar ne’e par abele mai, hakarak ka lakoi tenke mai.

Nia mos husik hela mensagen ba komunidade Municipiu Baucau katak husi Komando PNTL fo korajen nafatin ba familia sira nebe mak agora sedauk intrega an husu para bele kontribui, mai ho diak, lakoi kontribui mak nia konsekuensia kanek, mate ne’e lori triste ba parte hotu. Eus

Jornal Nacional