LAKOHI RENDE, EOK HAKOTU PEREGRINASAUN MM IHA VENILALE

Forsa Empeñamentu Operasaun Konjunta (EOK), hakotu ona Komandante Konsellu Revolusaun Maubere (KRM) Paulino Gama ‘Mauk Moruk, iha loron Sabadu tuku 16:30 otl, iha área Watu Saha Loi, Aldeia Uai Talibu, Suku Uatu Haco, Posto Administrativu Venilale, Munisipiu Baucau.Molok atu iha kontaktu kilat EOK husu uluk MM atu rende maibe grupo MM hatan ho tirus hasoru nune EOK responde hodi hakotu MM nia peregrinasaun iha nia subar fatin iha Venilale.

Mauk Moruk mate hafoin kontra tiru ho forsa EOK, tanba Mauk Moruk rasik lakohi rende, hodi rezulta Mauk Moruk ho nia membru nain tolu mate iha fatin.

Elementus Mauk nian ne’ebé mate iha Sabadu mak, ho naran Julio, José Sunardi, Domingos Soares no Mauk Moruk rasik. Purtantu Mauk Moruk nia elementu ida ho naran Lemorai halai lakon ho kondisaun kanek todan ga grave.

Hafoin akontesimentu, mate isin Mauk Moruk evakua kedas husi Venilale Baucau mai Hospital Nacionál Guido Valadares Dili ho helikoptru. Helikoptru ne’ebé tula mate isin Mauk Moruk tu’un iha Aeroportu Nicolau Lobato, hodi kontinua lori kedas ba Hospital Nasional HNGV iha oras tuku 7 kalan hodi halo prosesu autopsia iha Domingu (09/08).

Bainhira mate isin Mauk Moruk lori to’o iha HNGV, mosu asidente balu ne’ebé la espera, tanba grupu deskoinesidus balu tuda karreta Estadu nian ne’ebé tula mate isin Mauk Moruk no kareta sira ne’ebé akompaña mate isin Mauk Moruk. Maibé situasaun ne’e, seguransa F-FDTL no PNTL konsege hakalma kedas.

Iha parte seluk, tuir informasaun husi terenu via telefone husi ema ne’ebé mak lakohi públika sai nia naran katak, Mauk Moruk kanek ona iha atentadu iha loron Kinta ne’ebé mak hamate Dominggos, no hakanek membru EOK nain 2 ne’e, maibé Mauk Moruk konsege aguenta kanek ne’e hodi halai lakon.

Iha loron tuir mai, tanba Mauk Moruk kanek ona, entaun nia haruka nia mata dalan atu tu’un mai hola aimoruk ba nia. Maibé tanba forsa EOK sira identifika ona mata dalan ne’e, entaun EOK kaer tiha mata dalan ne’e hodi haruka mata dalan ne’e SMS ba Mauk Moruk atu fó hatene nia subar fatin iha ne’ebé.

Bainhira Mauk Moruk simu sms ne’e husi mata dalan ne’ebé mak nia konfia ne’e atu lori aimoruk ba nia, Mauk Moruk sms fila fali ba nia mata dalan ne’ebé mak hola aimoruk ne’e hodi hatudu nia subar fatin.

Ho nune’e, forsa EOK sira akompaña mata dalan ne’e ba fatin ne’ebé mak Mauk Moruk hatudu ona. Bainhira to’o iha fatin ne’e, forsa EOK halo tiha nia subar fatin hodi haruka nia rende atu mai submete ba justisa.

Maibé tanba Mauk Moruk ulun to’os lakohi koopera ho Estadu, Mauk Moruk tiru forsa EOK sira hodi buka dalan atu halai. Iha minutu ne’eba mak mosu kontra tiru entre forsa EOK sira ho grupu Mauk Moruk hodi rezulta Mauk Moruk ho nia elementus sira mate iha fatin.

“Se sira halo tuir forsa EOK sira nia liafuan hodi rende karik, buat ne’e la akontese hanesan ne’e, maibé sira tiru uluk forsa sira mak forsa sira mós responde hodi sai hanesan ne’e,”informa fonte ne’e via telefone, Sabadu (08/8) hafoin akontesimentu ne’e.

Familia Triste

Entretantu, horseik (Dominggu), familia Matebian Mauk Moruk promete atu halo konferensia imprensa atu fó sai sira nia lamentasaun kona-ba Mauk Moruk nia mate ne’e. Maibé bainhira jornalista sira ba too iha L7 nia uma Bidau Mota klaran, la konsege realiza konferensia ne’e tanba sira sei iha situasaun triste nia laran.

Familia L7 haruka jornalista sira fila, no hein tempu ruma foin bele realiza konfrensia imprensa.

“Alin sira imi fila lai, tanba ema barak sei triste inklui joven barak mak triste hela no imi fila deit, depois ami bolu fali imi mai,”dehan familia Mauk Moruk ba jornalista Domingo, (09/08).

Tuir observasaun jornalista Diário ne’e nota katak, familia husi vitima sira ne’ebé mate, ba hamutuk ona iha Bidau Mota Klaran, hodi hein mate isin Mauk Moruk nian no nia elementus sira.

Familia sira mós hamutuk ho joven grupu balun tenta halo vizita atu ba haree Mauk Moruk nia mate isin, maibé parte seguransa la fó fatin, ho razaun sei hein prosesu autopsia no desijaun Estadu nian.

Forsa PNTL sira kompostu husi Bataliaun Ordem Publika (BOP), Task Force, Seguransa Sivil, Polisia Militar kontinua halo pasarevista ba karreta sira ne’ebé tama sai iha HNGV.cos

Jornal Nacional