Familia Iha Laga Kontinua Hein Mate Isin Mauk Moruk, Maske Sidauk Evakua Husi Dili

DILI - Familia Matebian Paulino Gama (Mauk Moruk) ho nia elementu nain 3 neebe tiru mate husi EOk, oras nee familia iha Postu Administrativu Laga, Municipiu Baucau ho laran triste no hakmatek hodi hein mate isin, maske mate isin nain hat seidauk desloka ba Baucau.

Tuir Komandante PNTL Esquadra Laga, Sargentu Duarte Ximenes (Soru) hatete, familia komesa rona banhira Mauk Moruk mate, halibur malu hodi hein mate isin iha uma Laga.

Tuir ami nia hare iha Postu Laga oras nee familia sira halo preparasaun atu simu sira nia mate isin no balu halo sentidu kondolensia no ami husu ba joven sira atu kria situasaun neebe diak no bainhira mate mai too iha Laga, atu ita halo serimonia funebre tuir kultura ida-idak nian,” dehan Duarte ba STL, liu husi Via telephone, Tersa (11/08/2015).

Nia haktuir tan katak, parte polisia nia observasaun situasaun geral iha Laga lao normal, tanba ema ida-idak oras nee preokupa ba preparasaun atu simu mate isin neebe sei desloka husi Dili ba iha Laga.

Iha tempu hanesan Administrador Postu Administrativu Laga, Francissco da Costa Belo hatete, familia matebian husi Laga, hotu-hotu konsentra deit iha Laga hodi hein mate isin Mauk Moruk ho elementu nain 3.

Tuir Informasaun Mauk Moruk nia isin mate oras nee sei tau iha nia uma Metiaut, Bidau Santa Ana Dili, hodi hein nia oan ho  Fen neebe sidauk too Husi Olanda mai timor, tanba nee Mauk Moruk nia isin mate hamutuk ho membru nain hat hanesan Domingos Soares, Alarico Almeida no no Julião (Deste), sei iha ninia rezidensia Metiaut. Informasaun kompletu iha STL Jornal no STL Web, edisaun Kuarta (12/8/2015). Lucia Ximenes Tomas Sanches

Suara Timor Lorosae