Komunidade Tapo/Memo Hala’o Kultura Annual, Duni Manu Keukai

Reportajen: João Mauleto

        

Maliana: Komunidade Suco Tapo/Memo, Postu Administrativu Maliana, Munisipiu Bobonaro, foin lalais ne’e hala’o kultura annual ne’ebé desde bei-ala sira husik ba gerasaun foun atu kontinua hodi proteje no prezerva sai riku soin no identidade Timor-Leste.

Lia nain duni manu keukai, Fernando dos Reis hateten, komunidade Tapo/Memo hala’o kultura duni manu keukai tinan ida dala ida. Kultura duni manu keukai ne’e hala’o desde vis avo antes agrikultores lere toos hodi prepara kuda fini antes tempo udan tun rai. Iha suco Tapo/Memo hala’o kultura parte malirin, ida seluk kultura parte manas nian. Kultura duni manu keukai hanesan parte malirin nian, katak Fernando. Fernando hatete desde tempo okupasaun Indonesia iha Timor-Leste, lia nain hamutuk komunidade Tapo/Memo deside kada tinan husu loron 2 to’o 5 Agostu hanesan data fiksu ba kultura annual duni manu keukai.  Tambe ne’e, iha tempo ukun rasik-án, governo lokal iha Munisipiu Bobonaro hatete ona programa kultura annual Tapo/Memo nian.

Fernando akresenta tan katak, antes hala’o programa duni manu keukai, fulan ida antes, lia sira bolu malu taka uluk mota ko’ak hodi bandu komunidade sunu duut iha area Suco Tapo/Memo. Iha seremonia kultura duni manu keukai, alvu importante mak fahi ulun no fahi isin tomak mak mate lori tau hamutuk iha ai hun lulik duran loron hat (4) nia laran.

Entertanto Clementino Vicente membru lia nain parte duni manu keukai hatete, fahi ne’ebé oho, feto sira mak leba troka malu to’o ai hun lulik. Aliende ne’e, durante duni manu keukai, komunidade Tapo/Memo tenke esforsu hetan fahi. Parte kultura duni manu keukai, feto-mane ninia dever hanesan. Mane mak oho fahi, feto mak leba troka malu, Clementino hatete.

Maske ema barak mak sente prekupa ho kultura duni manu keukai iha Suco Tapo/Memo, tamba durante duni manu keukai, komunidade sunu mutuk ai tuan laran mak bele projete be’e matan. Tamba ne’e, iha tempo V Governo Konstitusional tinan hirak liu ba, liu husi Secretario Estado Meio Ambiente, Nominando Buras desemina informasaun ba komunidade Tapo/Memo atu redus volume sunu duut hodi konsentra deit parte rai tetuk.

Antes ne’e Administrador Munisipiu Bobonaro, Domingos Martins iha enkontru hatete, prepara simu poder hudi governo sentral liu husi programa munisipiu, prezerva no proteje kultura nudar identidade povu no nasaun. Tamba, liu husi kultura mak ema husi rai seluk hatete diak liu identidade povu no munisipiu Bobonaro iha nivel nasional no mundu internasional.

Administrador Munisipiu Bobobaro hatete, liu husi kultura bele atrai turista atu mai vizita barak liu hodi aumenta resitas lokal ba munisipiu Bobonaro. Komunidade iha rai balu konta deit ninia istória pasado, mai pratika direita laiha ona. Kultura la hatama reseitas lokal direita ba munisipiu, maibé ho atrai turista mai iha Bobonaro bele apoiu desenvolvimentu fisiko ho desenvolvimento ekonomiku komunidade lokal.

Jornál Suara Timor Lorosae, Loron Kuarta, 12 Agostu 2015