Konfrontasaun Entre Suku Tapo/Memo no Saburai, Xefe Suku Lamenta ho Involvimentu Pesoal PNTL

Husi: Estaziariu      

Maliana: Xefe Suku Tapo/Memo, Postu Administrativu Maliana, Munisipiu Bobonaro, Gaspar de Jesus Concenção ezije Komandu Jeral Polísia Nasíonal Timor-Leste (PNTL) atu toma responsabilidade ba membru polísia ida ne’ebé hamutuk ho joven balu ba ataka populasaun sira.

Tuir informasaun ne’ebé diariu ne’e rekola husi xefe suku Gaspar katak, iha loron 4 fulan agostu liu ba, populasaun balu husi suku Tapo/Memo ba kasa animal hodi halo seremonia ritual no sira nia viajen laran sira hasoru malu ho membru komunidade Saburai ida iha nia toos laran. Ema sira husi Tapo/Memo ne’e konfronta malu ho katuas mane husi Saburai ne’e ho lia fuan. Parte rua hasai lia fuan hodi kontra malu. Hafoin ida ne’e, katuas mane ne’e fila ba uma no informa kestaun ne’e ba membru polísia ida iha Saburai.

Hafoin rona informasaun, pesoal PNTL ne’e hamutuk ho joven balun husi Saburai ba asalta populasaun iha Aldeia Pipgalag II, suku Tapo/Memo.

“Hau lamenta ho asaun ne’ebé mak polísia halo no asalta hau nia populasaun iha Aldeia Pipgalag II. Husu ba Komandante Jeral PNTL tenke tau atensaun ba problema ne’e,” dehan Gaspar liu husi via telemovel ba INDEPENDENTE, Tersa (11/8/2015), horiseik.

Nia husu Xefe Suku Saburai tenke koopera ho populasaun husi Suku Saburai hakalma situasaun ne’e, tamba asaun hirak ne’e halo nia populasaun husi Aldeia Pipgalag II, liu-liu labarik sira traumatiza.

Iha fatin ketak Xefe Suku Saburai Antonio Borges hateten liu husi via telemovel katak husi Suku Tapo/Memo mak halo konfrontasaun ba nia populasaun ida husi Saburai, tamba ne’e mak nia rasik haruka polísia hamutuk ho joven sira ba halo asaltu Aldeia ne’e.

“Problema ne’e iha loron 4 fulan agostu ida ne’e ne’ebé husi Aldeia Pipgalag II ne’e mak mai halo krimi ba iha katuas ida ho naran Romaldo ne’e tamba katuas ne’e ba nia toos ba haree nia modo no lis ne’e mak nia kuda hela iha toos, tamba nia tauk ema fokit ka naok ninia lis ne’e,” dehan nia.

Nia hatete nia agora organiza hela nia populasaun sira atu tuur hakmatek hodi hein rezultadu diak husi problema ne’e. “Hau mos organiza ona hau nia populasaun sira hapara no hakmatek labele kria tan problema ita tenke buka lia los, hein deit ita resolve problema ne’e nia rezultadu oinsa,” katak nia.

Jornal Independente