ABAIXO PENSAUN VITALISIA

DILI - Movimentu Universitáriu Timor –Leste (MUTIL) halo asaun pasífiku hasoru  estadu liuliu ezije ba Parlamentu Nasionál  (PN) atu diskuti fila-fali no halo alterasaun ba lei númiru 1/2007 kona-ba pensaun vitalísia ne’ebé fó pensaun pursentu atus ida (100%) ba eis membru órgaun soberanu inklui eis membru governu no eis deputadu sira.

MUTL lamenta tebes lei ne’e tanba aleinde fó pensaun hanesan ho saláriu báziku membru órgaun soberanu ne’ebé ativu hela, hahú hosi eis Prezidente Repúblika, eis Prezidente Parlamentu Nasionál, eis Primeiru Ministru, eis membru deputadu no eis membru governu hotu hetan mos direitu regalias.

Katak, eis membru órgaun soberanu sira liuliu eis Prezidente Repúblika, eis Prezidente Parlamentu Nasionál, Eis Primeiru Ministru no eis Prezidente Tribunál Supremu iha mos direitu ba hetan tratamentu médiku espesial iha rai-liur inklui família sira (estadu mak finansia), halo viajen ba rai-liur ho família sira ho pasaporte diplomata-klase VIP (estadu mak finansia), iha direitu atu hetan uma rua (2), ida ba rezidénsia no ida ba nia private office (estadu mak finansia), inklui iha funsionáriu nain rua (2) no asesor nain ida (1) hodi halo servisu ba nia (estadu mak finansia), iha direitu ba atu hetan kareta foun ida kada tinan 5 (estadu mak finansia), halo importasaun material konstruksaun livre taxa, iha telefone fiksu rua iha uma (estadu mak finansia), livre taxa (la selu eletrisidade no bee moos).

Porta-voz MUTL, Faustino Soares, afirma, lei pensaun vitalísia ne’e hamosu realidade injustisa boot ne’ebé akontese iha povu ne’ebé sei ki’ak iha nia rain ne’ebé riku maibé grupu ida maka goza mesak.

“Ami husu Parlamentu Nasionál atu urjentimente halo alterasaun ba lei ne’e,” afirma Porta-voz Faustino iha nia intervensaun iha demostrasaun loron dahuluk, Segunda (28/09), iha iha kampu ex 744, Becora Kulau-Dili.

Demostrasaun ne’ebé sei hala’o durante loron tolu ne’e, sei kontinua ho asaun seluk bainhira Parlamentu Nasionál la ba promote tan ba sira katak bainhira maka ajenda hodi halo diskusaun ba alterasaun lei ne’e.

Faustino hatete, tuir konkordánsia ne’ebé mak MUTL halo ho autoridade siguransa, katak, asaun ne’ebé  maka hala’o iha loron tolu nia laran la hetan rezultadu pozitivu konserteja sei muda estratejia atu nune’e aumenta lian bele sai bo’ot liu tan hodi nune’e ukun nain sira bele rona.

Nia hatutan, ema hot-hotu hatene katak, demokrasia ne’e ukun nain sira tenki rona povu nia lian no asipirasaun, nune’e foin  sira bele halo lei no polítika tuir povu nia hakarak, maibé realmente povu barak mak sei kestiona  inklui ona mós ukun nain sira liu-liu Prezidenti Repúblika atuál inklui mós eis Prezidenti Josè Ramos Horta iha semana kotuk mós sira kestiona kona-ba  lei pensaun vetalísia ne’e maibé ukun nain iha PN laiha vontade para atu ko’alia.

“Ami halo ona peskija ba lei pensaun vitalísa ne’e, ami nia pesjika ne’e ami uza  metodu análisa  kausa efeitu, tanba saida mak kauza ne’e mosu no nia efeitu ne’e hanusa tanba ne’e mak ami halo analiza katak, ita haré  liu-liu iha parte aspeitu sosiál ekonomia polítika ba Timor nian ne’e kompara ba lei refere sei iha problema bo’ot,” lamenta Faustino.

Porta-voz ne’e mós husu ba Prezidente Repúblika, Taur Matan Ruak, atu haré tanba Prezidenti mós kestiona katak lei refere ladiak entaun tenki orientasaun mai hosi  leten para parte hosi  juridiku sira mós tenki haré  katak ninia fundamentu atu altera ne’e maka ida ne’ebé tenki haré  atu nune’e labele fó malisan at ida ba future Timor nian  ida ne’e mak estudante sira hakarak. (fer)

Timor Post