Fasilita Emprejariu La Selu Taxa Estadu, MP Ameasa Suspende Eis DG Alfandega Tinan 3

DILI - Iha alegasaun final Ministeriu Publiku akuza arguida Brigida da Silva ho pena efetivu tinan 2 iha prizaun, suspende ba tinan 3 ba krime abuzu poder no fraude fiscal. Enkuantu emprejariu Arthur Nagarjo prizaun tinan 3 suspende tinan lima ba krime fraude fiscal.

Liu husi alegasaun final Ministeriu Publiku husu ba tribunal atu aplika pena efetivu tinan 2 iha prizaun no suspende ba tinan 3 ba arguida Brigida da Silva tanba provadu komete krime abuzu poder no fraude fiscal.  No arguidu Arthur Nagarjo aplika pena prizaun tinan 3 suspende ba tinan 5 ba krime fraude fiscal.  Arguida Brigida provadu hanesan diretora geral Alfandega iha 2010 too 2013 , iha loron 20 fulan Febreiru 2013 arguidu Arthur liu husi nia kompania importa gajoel husi Singapura mai iha Dili. To iha porto arguidu la kumpri regras quick release, hodi la selu taxa ba estadu ho montante $ 237,89,59 centavus. Depois liu tiha loron 10 mak foin selu rihun $ 47,800 ba estadu, no taxa neebe seidauk selu hamutuk rihun $189,200.

Arguida Brigida autoriza arguidu hodi hasai gajoel husi Portu sem selu taxa ba estadu, tanba arguida aprova pedidu ba kompania hodi hasai mina husi Portu. Ho hahalok ida neemak MP akuza aguida komete krime abuzu poder no fraude fiscal. No arguidu Arthur hanesan emprejario la kumpri regras estadu nian, neebe bainhira foti sai mina la selu taxa ba estadu. Arguidu garantia ho nia gajoel neebe iha katak depois loron sanulu osan husi mina nee mak sei halo pagamentu ba estadu. Maibe depois loron sanulu arguidu la kumpri hodi selu osan rihun 237,89,59 centavus nee maibe foin selu deit rihun 42, 800. No osan neebe seidauk selu ba estadu hamutuk rihun 189,200. Ho ida nee MP akuza Arthur ho krime fraude fiscal.

Iha biban nee defesa husi arguida Brigida hatete, nia parte la satisfas ho krime neebe mak MP akuza ba nia kliente liliu kona ba abuzu poder. Tanba iha kazu nee arguida so halo tuir deit prosesu neebe mak iha ona, para oinsa estadu bele valorize emprejario ho estadu atu servisu hamutuk hodi oferese ahi ba povu sira.

 Tanba ahi nee importante ba servisu estadu nian, needuni hanesan estadu arguida tenke halo pedidu hodi bele hasai fodik mina nee. Sekuandu nia parte la ajuda emprejario, oinsa ho ahi bainhira emprejario sira la hatama mina ba iha EDTL nian. Signifika kuandu laiha mina, laiha mos ahi. Nunee servisu estadu nian mos sei la lao hotu. Tanba nee husu ba tribunal atu absolve arguida husi krime rua nee. Entertantu defesa husi parte arguidu Arthur nian husu ba tribunal atu aplika pena neebe justu ba nia kliente. Informasaun kompletu iha STL Jornal no STL Web, edisaun Kuarta (30/9/2015). Domingas Gomes

Suara Timor Lorosae