Novembru, MP Aumenta Tan Ema 11, Jose: Ami Prontu Husik Vicenti ba PSIK

DILI - Prokurador Geral Republika prontu husik Vicenti Brito hodi assume kargu foun neebe mak governu rekomenda, no konselho superior Polisia Sientifiku Investigasaun Kriminal (PSIK) rasik mak husu kuadru husi Ministeriu Publiku nian.

Tuir Prokurador Geral Republika Jose Ximenes hatete, bainhira konselho superior PSIK nian  halo Enkontru iha loron 9 Setemebru liu ba sira husu ba PGR karik iha kuadru MP balun hodi bele assume kargu PSIK nian para promove servisu investigasaun nian  hodi nunee ema bele komprende diak servisu ida nee. Nunee konselhu superior MP nian mos konkorda atu prokurador Vicenti atu assume kargu PSIK nian. Tanba iha loron 11 fulan Novembru mai nee ema nain 11 mak sei tama tan neebe nee la destaka servisu MP nian.

Bainhira sira husu hau nia ideia desde inisio bainhira estabelese PSIK nee, hau fo hau nia ema  ida nee. Tanba hau hatene nia no konese diak ninia kapasidade. Iha neeba kedas sira husu mai hau, hau fo kuadru nee ba sira katak ami nia ema mak nee deit, seluk laiha ona. Neebe momentu neeba tanba MP laiha ema, entaun  governo ida uluk nomeia ida  be sai ona nee. Agora mak governu ida nee nomeia fali ami nia kuadru neebe antes nee hau aprejenta tiha ona,” dehan nia ba jornalista iha Palasio Presidenti Republika Aitarak Laran, Segunda (28/09/2015).

Nia hatutan, iha Enkontru neeba mak konselhu superior PSIK husu ba PGR atu fo kuadru ida hodi assume kargu nee. Neebe PGR mos fo kuadru nee no lori mai iha konselho superior MP nia. Iha nee konselhu MP nian mos ratifika no hakarak kuadru ida neemak ba tur iha PSIK hodi bele ajuda servisu investigasaun nian.

Iha fatin hanesan, Provedor Direitu Humanu no Justisa  Silverio Pinto hatete, kona ba kazu Komandante Hermenegildo neebe hatoo  keixa ba iha PDHJ. Tuir nia ema hotu iha oportunidade atu aprejenta keixa bainhira la satisfas ho desaizaun balun neebe mak sira hasoru. Iha ida nee tempu badak sei halo inkontru hodi hare investigasaun  ba kazu nee, neebe Komandante Hermenegildo aprejenta ona nia dokumentus mai iha PDHJ. Informasaun kompletu iha ST Jornal no STL Web edisaun Tersa, (29/9/2015). Domingas Gomes/Timotio Gusmao

Suara Timor Lorosae