Amu Martinho: CNRT no FRETILIN iha Osan Barak atu Sosa Votus

Dosente Filozofia Polítika Semináriu Maior Fatumeta Díli, Pe. Martinho Gusmão fiar katak iha eleisaun jerál tinan 2017 mai ne’e, partidu CNRT no FRETILIN maka sei manán tanba partidu rua ne’e iha osan barak ona atu sosa votus.

“Ezemplu hanesan FRETILIN hosi ZEESM. Ne’e sira FRETILIN maka dehan rasik ba ha’u katak sira nia osan ba eleisaun barak ona mai hosi Oe-Cusse. CNRT mós iha ona tan mai hosi projetu tasi mane,” Amu Martinho dehan ba Matadalan iha nia rezidénsia, Domingu (14/09/2015), bainhira husu ninia pontu devista kona-ba eleisaun jerál tinan 2017 mai ne’e.

Nia tenik, partidu PD no Frenti-Mudansa mós iha tendénsia sosa votus maibé la barak hanesan partidu rua seluk.

Sosa votus ne’e, tuir nia katak ne’e CRIME ELEITORAL. Hosi aspeitu filozofia ne’e violasaun ba demokrásia duni.

“Ha’u nia esperiénsia, órgaun kompetente ladun iha sansaun forte ba money politics tanba oknum hosi órgaun kompetente favoritizmu atu hetan “jabatan” foun maka forte. Iha ema balun ne’ebé serbisu atu governu foun mosu karik sira hetan fatin, to’o dala ruma sira bele hamriik halo actionhasoru fali membru rasik. Lori malu to’o Tribunál. Sorte boot tan mídia no observadór sira la deteta,” Pe. Martinho informa.

Nia dehan katak Lei Eleitoról mós tenki klaru inklui órgaun ba administrasaun eleitorál hanesan CNE, STAE ho Tribunál tenki forte.

Durante ne’e, tuir Pároku Parókia Manatuto ne’e nia haree katak partidu sira tendensialmente bosok maka barak. Nia fó ezemplu katak manán iha fatin ida, ba halo fali projetu fatin seluk. Lakohi halo opozisaun maibé ba curhat fali iha povu nia leet. Promete tiha iha eleisaun, dún malu fali iha ezekusaun. Ne’eduni, povu baruk haree partidu sira. (Anibal)

Matadalan