PREZIDENTE REPÚBLIKA, TAUR MATAN RUAK HASORU MALU HO BOLSEIRU SIRA IHA XINA

Dili, Radio Liberdade Online- Prezidente Republika, Taur Matan Ruak, ne’ebé akompañadu ho Primeira Dama, Isabel da Costa Ferreira, no Ministru Negosiu Estrangeirus no Kooperasaun, Hernani Coelho Sexta-Feira lorokraik, halao vizita ba Embaixada TL iha Beijing ne’ebé simu husi Embaixadora Vicky Tchong iha okaziaun partisipasun Xefe Estadu nian iha Selebrasõens “70º Aniversáriu Vitória husi Povu Xinêz iha Funu Rezistênsia hasoru Agressãun Japoneza no Funu Anti-Facista”, iha II Guerra Mundial.

Hafoin halao vizita ba Embaixada, Prezidente Repúblika Taur Matan Ruak, akompañadu hosi Primeira Dama, Isabel da Costa Ferreira, Ministru Negosiu Estrangeirus no Kooperasaun, Hernani Coelho no Embaixadora Vicky Tchong hasoru malu ho Estudantes Timoroan ne’ebé halao estudus iha Xina iha Hotel Kempinski, Rua, 50 Liangmaquiao, Munisípiu Chaoyang, Beijing. 

Iha enkontru ne’e rejista diskursu rua, dahuluk, Diskursu Boas vindas husi Lider estudantes Timor-Oan (iha China) no daruak, hosi Prezidente Repúblika, Taur Matan Ruak, ne’ebé enkoraja estudantes hotu atu estuda ho di’ak, iha dedikasaun no empeñu, hodi bele garante susesu iha sira nia (prosesu) aprendijazen, atu ho koñesimentu ne’ebé sira hetan bele benefisia Timor-Leste ne’ebé oras ne’e dadaun iha hela faze dezenvolvimentu.

Prezidente Republika, Taur Matan Ruak, ne’ebé akompañadu ho Primeira Dama, Isabel da Costa Ferreira, no Ministru Negosiu Estrangeirus no Kooperasaun, Hernani Coelho hamutuk ho Embaixador TL iha Xina, Vicky Tchong, Sexta-Feira dader, oras 10:40 halao vizita ba Eskola Tékniku-Profissional Changping, lokalizada iha Zheng Yangiu, Songlanpu Shahe Changping, iha Pequim Xina.

Durante eventu refere, Sentru Demostrasaun Agrikóla (quinta Pedagózika), hetan atensaun espesiál, liuliu, iha pavilaun ida ne’ebé promove investigasaun no dezenvolvimentu ba ai-horis sira ho tipu orquidea ho parseria hosi empreza Taiwonders.

Xefe Estadu fila mai Dili iha loron Kinta-Feira (10/09/2015) ho aviaun Silk Air husi Singapura hafoin partisipa iha Selebrasõens “70º Aniversáriu Vitória husi Povu Xinêz iha Funu Rezistênsia hasoru Agressãun Japoneza no Funu Anti-Facista”, iha II Guerra Mundial ne’ebé halao iha Beijing Xina iha loron 02 no 05 Setembru 2015. 

Rádio Liberdade Dili