SANSAUN LA RESPEITA HIRARKIA

Jornal Nacional, editorial

Konsellu Koordenador Polisia Cientifika Investigasaun Criminal iha loron 9 fulan Setembru deside ezonera, hasai diretor Polisia Cientifika Investigasaun Criminal tamba konsidera la respeita hirarkia, ‘ insubordenasaun’.

“So ke husi relatorius, informasaun no provas hotu ne’ebé konsellu koordenador hato’o mai katak, Sr. Diretur PCIC, la suburdina nia an ba mekanismu sira ne’e, nia halo sasan ses husi mekanismu de koordenasaun, entaun iha organizasaun ida, wainhira iha insubordinasaun, entaun autoridade tenke deside,” Rui Maria de Araújo

Losduni señor, inistituisaun hanesan Polisia nee tenki servisu tuir liña komando, respeita hirarkia, membru ida kuandu servisu la respeita ona superior tenki deside atu nunee servisu lao tuir liña nebe iha.

Karik ezonera tamba komete kazu insubordenasaun, nee laiha ema mak kestiona maibe labele ezonera ema husi posisaun ida tamba viganza ka odiu ruma ou ema nee atu deskobre ita nia sala hodi nunee ezonera lalais atu labele deskobre sala nebe ita komete.

Agora duvida mak ezonerasaun nee puro komete insubordenasaun ka iha buat balu nebe lalos hafalun hodi nunee atu deskobre buat sira nebe durante nee taka metin nee atu deskobre hodi nunee tenki ezonera lalais ema nee atu nunee labele deskobre naksalak sira nebe iha.

Polisia investigasaun cientifika kriminal nee laos servisu ida nebe halimar nia. Instituisaun nebe bele ajuda estadu hodi halo investigasaun atu bele deskobre mafia sira nebe involve alto nivel.

Ne’ebe keta halo ba ezonerasaun nee laos tamba komete insuborndenasaun maibe atu evita insituisaun nee deskobre segredu no mafia karik involve politiku nain sira no lider auto nivel sira.

Atu ezonera ka kontinua asumi kargu, nee kompetensia superior atu deside, maibe ba kazu nee, direitor Polisia Cientifika Investigasaun Kriminal, Hermenegildo Goncalves la konkorda ho deklarasaun PM Rui ninian nebe publika iha media nasional sira katak ezonerasaun nee tamba komete krime insubordenasaun.

“ha’u hakarak atu halo auto defeza ba ha’u, pirmeiru hanesan humanu, hanesan sidadaun ida no hanesan ema ne’ebe partisipa ba aktividade aktivista durante luta ba ukun rasik an iha nasaun ne’e. Ha’u sei nafatin hala’o ha’u nia knaar hanesan Direktur Nasional Polisia Sientifika Investigasaun Kriminal (PSIK) nian wainhira seidauk iha justifikasaun klaru husi Tribunal kona deklarasaun husi Primeiru Ministru ne’ebe hatete ha’u halo Insubordinasaun ka la respeita hirarkia iha institusaun,” Hermenegildo Goncalves.

Laiha duvida, nudar sidadaun iha direitu atu defende an, defende naran diak kuandu ema ruma halo deklarasaun nebe ofende naran diak ka dignidade nudar emar ka halo akuzasaun falsu, la ho evidensia nebe forte.

Agora atu pecat ema ida husi posizaun ida nee kompetensia insituisaun nebe tutela ba, importante labele desisaun ho intrese pessoal, viganza no odiu tamba dezisaun sira nebe baseia ba buat nebe mensiona nee sei la fo benefisiu desenvolvimentu pais nee *

Jornal Nacional