VIZITA TRABALLU BA NOVA IORQUE, PM RUI SEI KOALIA FRONTEIRA MARÍTIMA IHA ONU

Primeiru Ministru (PM), Rui Maria de Araújo akompaña husi delegasaun altu nivel hala’o vizita ofisial ba Estadus Unidus Amerika, Tersa (22/9), hodi partisipa iha eventu importante balu ne’ebé mak sei hala’o iha Nova Iorque.

Iha vizita traballu ne’e, PM Rui Araújo sei halo intervensaun iha Asembleia Jeral Nasoens Unidas, no sei koalia kestaun fronteira marítima entre Australia ho Timor Leste.

“Iha enkontru sira ne’e, ita sei iha oportunidade atu diskuti, iha Asembleia Jeral, konserteza ita wainhira halo diskursu, ita levanta kestaun ne’e (fronteira marítima), hanesan ita nia preokupasaun, maibé mós iha oportunidade atu halo enkontrus bilaterais, ho paises sira seluk, buka aprende tan, saida mak nasaun sira seluk nia esperensia kona-ba área delimitasaun fronteiras marítimas,”informa PM Rui Araújo ba jornalista sira iha Aeroportu Internasionál Nicolau Lobato Comoro Dili.

Xefi Governu ne’e dehan, tanba atu levanta kestaun fronteiras marítima ne’e iha ONU ne’e mak, elementus iha gabinete fronteira marítima ne’e, sira ne’e mós partisipa hotu iha delegasaun ne’e.

Vizita traballu PM Rui Araújo nian ne’e, akompaña husi Ministru Planeamentu Investementu Estratejiku, Kay Rala Xanana Gusmão, Ministru Negosius Estrajeirus i Kooperasaun, Hernani Coelho, Eis Prezidente Repúblika, José Ramos Horta, Primeiru Ministru nia espoza, Tereza Madeira Soares, Governador Banku Sentral, Abrão Vasconcelos no elementu sira seluk iha gabinete fronteira marítima nian.

Iha Nova Iorque, delegasaun Timor Leste sei halo enkontru bilateral ho Sekretáriu Jeral Nasoens Unidas, Ban Ki Moon. Iha enkontru ne’e, PM Rui Araújo sei fó agradesementu ba buat ne’ebé mak Nasoens Unidas halo tiha ona mai Timor Leste durante ne’e.

“Hakarak informa ba publiku tomak katak, nu’udar Xefi Governu, ohin (horseik) sefia delegasaun ida ba Asembleia Jeral Nasoens Unidas ninian, reprezenta Estadu tomak, atu partsipa iha aniversariu ba dala 70 organizasaun Nasoens Unidas nian, i aomesmu tempu mós, iha asemblea jeral ne’e, sei adopta buat ne’ebé bolu, objetivus dezenvolvimentu sustentavel,”relata Rui Araújo.

Nia esplika, bainhira nasaun tomak iha mundu adopta ona objetivu foun ida ne’e, mak sei sai hanesan objetivus global ba dezenvolvimentu sustentavel nian.

Nia haktuir, iha prosesu atu hamosu objetivus global ba dezenvolvimentu sustentavel, Timor Leste partisipa ativamente, hahú kedas husi painel altu nivel ida, ne’ebé iha V Governu konstitusionál, nomeia ona eis Ministra Emilia Pires partisipa iha painel ne’e.

Hafoin Timor Leste partisiapa ativamente iha dezenvolvimentu objetivu espesifiku ida, ne’ebé koalia kona-ba paz, seguransa no kapasitasaun instituisaun sira nian hanesan kondisaun importante atu lori dezenvolvimentu ba umanidade tomak.

“Hanesan ema hotu hatene katak, objetivus global dezenvolvimentu sustentavel ninian ne’e, iha 17 no ninia meta final ne’e mak atu halo lakon ki’ak mukit rabat rai iha mundu, no atu halo lakon desigualdade no injustisa, i atu hapara mudansa klimatika ne’ebé akontese iha mundu tomak,”dehan Xefi Governu ne’e.

Rui Araújo esplika, objetivu 17 ne’e, sei lori mundu ba alkansa objetivu tolu ne’e, no tanba objetivu tolu ne’e importante, Timor Leste mós sei partisipa ativamente iha prosesu adosaun.

Timor Leste involve an klean tebes durante hala’o prosesu ne’ebé sei lori ba aprovasaun husi objetivu dezenvolvimentu sustentavel nian ne’e, hodi buka atu garante katak, ida ne’e bele hatan ba nesesidade ki’ik sira Estadu nian, no sensivel ba kontestu nasaun sira nian atu sai husi konflitu.

Lider internasionál liu 150 mak marka prenzensa iha okaziaun istoriku ne’e, hodi adopta susesor husi objetivu sira dezenvolvimentu mileniu nian. Objetivu husi dezenvolvimentu sustentavel ne’e, sei estabelese planu id aba ema, ba planeta no ba moris di’ak ne’ebé sei orienta atividade sira komunidade internasionál durante tinan 15 nia laran.

PM Rui Araújo sei ko’alia iha lansamentu inisiativa polítika ida kona-ba apoiu ba ezekuta ajenda dezenvolvimentu sustentavel 2030, no iha simeira dialogu ida kona-ba atu hari’i instituisaun hirak ne’ebé efikas, responsavel, no inkluzivu, hodi bele hetan dezenvolvimentu sustentavel nian.

Husi Nova Iorque, delegasaun Timor Leste sei aproveita oportunidade hodi halo vizita ofisial ida ba Cuba, hodi kumpri konvite ne’ebé mai husi Prezidente Repúblika Cuba, Raul Castro.

“Ha’u sei reprezenta Governu atu halo vizita ofisial ne’e, hamutuk ho Ministru Negosius Estranjeirus ho tan Ministru Koordenador Asuntu Sosial ho mós Ministra Saúde ba vizita Cuba, atu reforsa ita nia kooperasaun ne’ebé iha tiha ona,”informa Rui Araújo.

Iha vizita ba Cuba ne’e, PM Rui ne’ebé Xefia delegasaun Timor Leste ne’e, hato’o mós agradesementu ba Cuba, ba sira nia apoiu tomak ne’ebé durante ne’e Cuba halo mai Timor Leste, hahú kedas iha tinan 2004.

Kooperasaun Timor Leste ho Cuba ne’e, ninia emfaze importante ida mak, formasaun rekursus umanus espesifikamente iha área Saúde nian, i liu tiha tinan 11 ona Timor-ona sira bele haree dadauk ona rezultadus husi kooperasaun ne’e.

Tanba ida ne’e, Rui Araújo dehan, iha vizita ida ne’e, nia aproveita oportunidade ne’e, lori Governu nia naran, agradese povu no Estadu Cubanu ba sira nia apoiu tomak durante ne’e.cos

Jornal Nacional