KOMANDU HEIN DESIZAUN GOVERNU BA EMA INDONEZIA IHA PNTL

DILI - Komandante Jerál  Polísia  Nasional Timor Leste (PNTL), Komisáriu  Júlio da Costa Hornay, afirma, governu mak iha kompeténsia foti desizaun ba ema Indonézia ne’ebé sai tiha ona membru Polísia Nasionál Timor Leste (PNTL).

Hornay hatete, komandu laiha kompeténsia ba kazu ida ne’e tanba ema Indonézia hirak ne’e involve ona iha PNTL dezde rekrutamentu ne’ebé UN (United Nations) maka toma konta hahú iha tinan 2000 too 2005.

Eis Komandante Akademia PNTL ne’e hatutan, governu maka bele husu ba UN atu esplika rajaun saida maka simu ema Indonézia sira ne’e tama iha PNTL maske iha momentu rekrutamentu ne’eba nia mos sai hanesan sujeitu ida.

“Membrus PNTL tomak inklui ha’u sai sujeitu ba prosesu rekrutamentu ne’e mak ha’u konsege hatoo ba Polísia  UN mais sira dehan ida ne’e administrativamente kompeténsia  UN ninian tuir lei regulamentu 1/1999,” subliña Hornay iha konferénsia ba imprensa iha Kuartel Jerál PNTL, Kaikoli, Sesta (18/09).

Nia hatutan, só hatene maka prosesu rekrutamentu ne’ebé organiza hamutuk ho Sekretáriu Estadu Seguransa (SES) iha tinan 2011 maka hamosu kedas ona kritéria ida katak sidadaun original Timor mak bele sai membru PNTL.

“Ami tau iha ne’eba se mak atu kompete ba vaga hodi sai polísia primeiru nia tenki sidadaun Timor,” Hornay dehan.

Komandu sei halo lista ba membru PNTL hirak ne’ebé mak la’ós sidadaun Timor Leste.

Entretantu tuir fonte Timor Post iha komandu jerál PNTL, haktuir, membru hirak ne’ebé seidauk sai sidadaun Timor Leste hamutuk nain sanulu (10) maioria hosi Atambua no Kupang - Indonézia. Membru hirak ne’e kaben ona ho ema Timor.

Liu hosi Komunikadu Imprensa Organizasaun Non Govermental (ONG) Fundasaun Mahein (FM), afirma, tuir lei sidadania artigu 11 alinea 2 katak, ema estranjeiru ne’ebé  mak atu hetan sidadania bainhira lakon ona nia nasionalidade uluk nian (liu ona prova administrasaun) maka konsidera hanesan sidadaun Timor Leste.

Diretór FM, Nelson Belo hatete, mosu faillansu boot iha prosesu rekrutamentu tempu UN nian hanesan prosesu rekrutamentu PNTL ne’ebé  lidera hosi UNPOL iha tempu UNTAET ne’ebé  aplika kritéria  internasional hodi hare de’it  ema nia altura no esperiénsia  maibé  la aplika kritéria  ne’ebé  rigorozu ne’ebé  mak hetan ona krítika  hosi sosiadade sivil iha tempu refere.

Iha komunikadu ne’ebé Timor Post asesu iha, Kinta (17/09) ne’e, Nelson hatutan, departamentu rekursu humanu PNTL nian presija verifikasaun dokumentus pesoal membru Polísia  ativu liu-liu elementu ne’ebé  mak rekruta iha tempu UNTAET, tanba mekanismu rekrutamentu iha tempu ne’eba la dun rigorozu hafasil ema falsifika dokumentus.(way)   

Timor Post