RT OHO NIA OAN RASIK

DÍLI - Inan feton ida ho naran inisiál RT ne’ebé maka la hanoin barak la senti tauk hodi oho fali nia bebé ne’ebé maka foin partus mai seidauk to’o tan minitu balun hodi hateke mundu ne’e nia naroman. Akontesementu ne’e akontese iha Kampung Baru, Komoro, Díli.

Tuir sasin Maria Imaculada de Jesus dos Santos dehan, inan ne’e serbisu iha sasin ne’e nia uma nudarPembantu Rumah Tanggadepois loron Kinta (17/09) dader tuku 9 Otl, inan ne’e tama haris fatin hodi bolu sasin ne’e ba maibé nia la ko’alia buat ida depois halai tama ba nia fatin no xavi tiha odamatan, maibé sasin ne’e haree ran barak maka fakar iha haris fatin no tuir dalan tama to’o RT nia kuartu.

“Ha’u haree tiha ran ne’e maka ha’u ba bolu nia (RT) maibé nia la hatan tanba ne’e maka ha’u ba bolu fali ha’u nia maen hodi ba haree nia. Ha’u nia maen ba bolu maka foin nia loke odamatan husu nia dehan nia menstruasaun maka halo nia ran fakar barak maibé ami la hatene katak bebé ne’e nia kesi tiha ho dasi tau hela iha pasta laran ne’ebé mate tiha ona,” haktuir sasin ne’e ba jornalista sira iha Kuartel Jerál PNTL, Kaikoli, Kinta (17/09).

Nia hatutan, depois haree RT nia kondisaun ran fakar maka’as maka foin sasin sira ne’e atu ba bolu ambulánsia hodi lori nia ba ospitál hodi konsulta maibé nia dehan nia oin maka halai, entaun uma na’in obriga de’it lori ba ospitál maibé nia halai fila ba kuartu laran lori fali pasta ne’ebé maka bebé iha laran.

“Ha’u ba bolu de’it taxi mai ona no lori sasán sai ba iha liur no atu tula nia ba ospitál nia dehan nia matan halai no oin nakukun, tan ne’e fali kuartu lori pasta ne’e mai uza hena ida taka tiha pasta ne’e nia biin ida maka dehan ba ha’u nia maen haree took pasta ne’e saida maka iha laran no ha’u nia maen ba rakut nia pasta loke haree duni bebé ne’e mate ona no tau hela pasta ne’e nia laran,”  Maria haktuir.

Nia hatutan liu tan, partus iha oras hira sira la hatene tanba bebé ne’e la tanis ida maibé sira hetan loloos ne’e tuku 9 dader Otl, bebé ne’e mane oan ida.

Iha fatin hanesan, Komandante Serbisu Investigasaun Kriminál Nasionál (SIKN), Superintendenti Ludgerio Lay dehan, kazu ne’e hatama ona ba Ministériu Públiku (MP) no ekipa forénsiku ba ona rekolla evidénsia bebé oan ne’e nian iha lokal de krimi no sei lori bebé ne’e nia inan ba  Hospitál Nasionál Guido Valadares (HNGV) hodi halo tratamentu tanba nia kondisaun grave oituan.

“Ita bolu ona sasin sira mai iha ne’e sé ohin maka prosesu ne’e ramata ita lori kedas ba rejistu iha Ministériu Públiku (MP) para prosesu ba oin,”  dehan Ludgerio.(Way)

Timor Post