MINISTÉRIU BARAK HUSU OSAN ADISIONÁL, OJE 2016 SEI LIU HUSI US$ 1.3 BILLOENS

Tuir pakote fiskal tinan 2016 ne’ebé diskuti ona aprova tiha ona iha Konsellu Ministrus define ona katak, orsamentu jeral Estadu 2016, labele liu husi US$ 1.3 billoens.

Maibé iha diskusaun komite revizaun orsamentu tinan 2016, iha ona indikasaun katak, orsamentu tinan 2016 nian sei liu husi US$ 1.3 biloens, tanba ministériu barak mak husu osan adisionál.

Vice Ministru Finansas, Helder Lopez informa katak, diskusaun Komite Revizaun Orsamentu tinan 2016 ne’e, hahú iha loron 7 Setembru no sei remata iha loron 17 fulan Setembru.

“Iha indikasaun katak, proposta orsamentu mai barak, nune’e komite revizaun orsamentu nivel polítiku haree katak, iha proposta adisionál balu ne’ebé ke persija konsidera, nune’e iha indikasaun katak, US$ 1.3 biloens ne’e bele sa’e tan uit oan,”informa Helde Lopez ba jornalista sira iha Ministériu Finansas, Kuarta (16/9).

Nia hatutan, durante diskusaun ba orsamentu kada Ministériu, Komite Revizaun Orsamentu haree katak, Ministériu barak mak husu osan adisionál.

Nia haktuir, bainhira kada ministériu ida aprezenta lista adisionál ba komite reviasaun orsamentu, sira mós aprezenta sira nia justifikasaun kona-ba, tanbsa mak sira husu osan adisionál.

“Sira nia justifikasaun ne’e, konvense duni komite revizaun orsamentu, entaun aprova, maibé enprinsipiu, lista adisionál ne’ebé mak aprova husi komite revizaun orsamentu, aliña ho prioridades Governu nian, ne’ebé ak Governu anunsia on aba públiku liu husi diskusaun,”dehan nia.

Helder dehan, kona-ba lista ministériu ne’ebé mak husu osan adisionál, nia seidauk bele fó sai, tanba diskusaun orsamentu ne’e, se la’o hela, no aban (ohin) mak foin remata.

Maibé Helder dehan, maske diskusaun orsamentu ne’e seidauk remata, maibé iha ona indikasaun katak, orsamentu 2016 ne’e, sei sa’e uit oan.

“Kona-ba se mak barak liu ne’e, tanba seidauk hotu bee, ita seidauk hatene, ida ne’ebé ke iha ona, buat ne’e bariadu,”katak Helder Lopez.cos

Jornal Nacional