Kazu Emilia, Kontratu Uluk Foin Hare Ekipamentus

DILI - Macs Metal Craft (MMC) uniku kompania neebe laiha kompetisaun ho kompania seluk hodi kaer projetu sosa kama ba hospital. Kontratu nee halao uluk hafoin MS hare ekipamentus.

Julgamentu ba dala hitu nee tribunal kontinua rona Sasin Avelino Afonso Brites neebe agora dadauk servisu iha departementu medicu Ministeriu Saude hahu 2012 too agora. Iha 2009 too 2011 nia hanesan xefi departementu aprovizionamentu MS nian, no iha 2012 hanesan xefi jestaun ekipamentus saude iha MS.

Ba tribunal nia deklara katak, nia iha konesementu kona ba projetu sosa kama nee. Neebe momentu neeba iha duni proposta atu hola kama ba hospital. Neebe nia mak halo dokumentus kotasaun ka brosur tender nian, tanba desizaun husi arguida Madalena. Desizaun ba proposta nee mai husi vice ministra Madalena Hanjam no arguida rasik mak asina hodi hatoo ba ministru no hetan aprovasaun husi primeiru ministru Xanana Gusmao.

Ami simu orientasaun husi desizaun vice ministra hodi halao deit, ami laiha kompetensia ba prosesu nee. Proposta nee mai husi assessor internasional ida naran Brush Norseon neebe mak lori hela dokumentus kotasaun ka brosur kompania nian mai iha ho nia folin kedas. Simu tiha brosur neemak hau prepara dokumentus tenderizasaun nian,”dehan nia iha tribunal, Segunda (26/10/2015).

Sasin nee salienta katak, projetu nee laliu husi prosesu CAMS nian, maibe tuir prosesu tenderizasaun projetu hotu tenke liu husi prosesu CAMS neebe mak ministru forma ona iha 2011 neeba. Tuir lolos prosesu nee ba uluk iha CAMS depois mak ba iha aprovizionamentu mak foin bele aprova. Maibe prosesu nee direita husi vice ministra deit.

Projetu sosa kama nee primeiru kontratu iha 2011, maibe kona ba data mak nia la lembra ona. Maibe halo iha 2011 nia laran. No distribuisaun kama ba hospital hahu iha 2012, iha kama hamutuk 42 mak ba iha HNGV, Maliana 8, Maubessi 8. Distribuisaun kama ba etapa primeiru nee nia mak asina, kama total 80. Maibe tuir relatorio CAC nian kama sira neebe haruka ba iha hospital referensia laos tuir numeru neebe iha maibe menus liu fali. Informasaun kompletu iha STL Jornal no STL Web, edisaun Tersa (27/10/2015). Domingas Gomes/Joao Anibal

Suara Timor Lorosae