Lere Anan: “Nudar Forsa Ita la bele Bandu Jornalista halo Kobertura”

Dili, Radio liberdade Online – Sekretariu Estadu Komunikasaun Sosial (SEKOMS) no  reprezentante media iha Timor-Leste  kuarta Feira 28/10/2015, halo sosializasaun lei komunikasaun sosial ba Forsa Defeza no Polisia Nasional Timor-Leste.

Objetivu husi sosializasaun ne’e  atu  esplika kontiudu husi lei Komunikasaun Sosial ba Falentil Forsa Defeza Timor-Leste (F-FDTL)  no Polisia Nasional Timor Leste (PNTL), atu sira bele kompriende  didiak  konaba funsaun no kna’ar Jornalista nian hodi fasilita jornalista sira nia aktividade iha terenu.

Sekreteriu Estadu Komunikasaun Sosial, Nelio  Isaac Sarmento,  iha nia Diskursu hateten sosializaun  lei komuniksaun sosial ba F-FDTL no PNTL ne’e importante tamba serbisu jornalista nian iha ligasaun barak ho instituisaun rua ne’e nia papel.

Iha fatin hanesan Maijor jeneral, Lere Anan Timur, iha nia diskursu hateten, media no forsa tenki kolabora hamutuk hodi fo informasaun ba Publiku ho lolos tuir intese povu nian, labele uza lia fuan ne’ebe hamosu impaktu ba povu.

Major Jeneral husu ba delegadus Forsa defeza sira atu labele taka dalan ba jornalista sira atu halo kobertura. 

Nia esplika iha parte siguransa nia laos buat hotu-hotu segredu, iha buat balun segredu, maibe iha mos informasaun ne’ebe mak interese duni ba publiku, tan ne’e presiza duni fasilita jornalista sira atu halo kobertura.

“nudar forsa ita labele bandu jornalista sira halo kobetura, sira tenki halo kobertura, iha area balun ne’ebe halo kobertura ita buat balun ne’ebe jornalista sira labele halo kobertura, hanesan foin dadaun operasaun ba Mauk Moruk nian, ami lahatan jornalista sira halo kobertura,”  tenik Lere iha Kuartel Jeral F-FDTL Fatuhada.

Entertantu segunduKomandante jeral PNTL, Komisariu, Faustino da Costa,  husu ba media sira atu kolabola hamutuk ho instituisaun PNTL, tamba iha kazu balun ne’ebe mak presiza tempu atu halo investigasaun klean no rekolla dadus sira atu nune’e informasaun to’o iha publiku tuir dadus ne’e iha.

Tuir planu Sekretariu Estadu Komunikasaun Sosial no ekipa media kontinua halo sosializasaun lei komunikasaun sosial ba instituisaun Guvernu hotu  atu sira bele komprende didiak serbisu jornalista nian.

Rádio Liberdade Dili