Kazu Avo Jape-Nheu, TDD Marka Ona AF

DILI - Tribunal Distrital Dili marka ona Alegasaun Final (AF) ba loron neebe mak notifika ona. Neebe foin lais nee tribunal halo ona inspesaun ba rai Dolok Oan neebe mak halo emprejariu nain rua nee dada malu too iha tribunal.

Tuir official justisa neebe mak kaer prosesu nee hatete, agenda ba alegasaun final tribunal notifika ona ba iha loron 12 fulan Janeiru 2016 tuku rua loraik.

Antes nee liu husi inspesaun iha lokalizasaun, Juis Presidenti Jose Maria de Araujo hatete, liu husi inspesaun nee para bele kompleta tan provas neebe mak iha ona prosesu julgamentu nia laran, dehan nia ba Jornalista.

Iha fatin hanesan lezadu Jape Kong Su hatete, tribunal mai hare sasan neebe mak estraga husi arguidu Nheu ho nia elementu sira. Maibe kona ba rai, nia laiha problema ho arguidu. Tanba rai nee nia halo kontratu ho estadu.

Entertantu arguidu Ricardo Nheu hatete, uma neebe iha nia harii kedas iha 2003 nia laran. Iha 2006, krizi nia laran ema sobu hotu tiha kaleng. Depois nee mak hadia hodi tau fali foun. Avo Jape taka tiha portaun, dalan kareta nian uma nee iha tiha ona.

Antes nee iha audensia julgamentu sasin husi parte defeza João da Costa Lodriques Perreira deklara katak, nudar rai nain nunka mais faan rai ba kompana Timor Plaza (TP). Rai nee iha tempu uluk kedas faan ba Ricardo Nheu laos ba TP. Informasaun kompletu iha STL Jornal no STL Web, edisaun Tersa (5/1/2016). Domingas Gomes

Suara Timor Lorosae