Família Lakon Morál, Prostituisaun Butuk

Bazeia ba relatóriu ne’ebé Ministériu Saúde publika liuhosi deklarasaun Prezidente Komisaun Nasional Kombate (KNK) HIV/AIDS katak ema ne’ebé hala’o vida prostituisaun iha Timor-Leste hamutuk 1688.

Sefe Ezekutivu Fundasaun Alola, Alzira Sequeira Freitas Dos Reis hatete prostituisaun komesa aumenta iha TL tanba família ohin loron lakon ona moral, inan-aman laiha komunikasaun ida di’ak ho oan, tanba ne’e joven barak maka mete iha vida prostituisaun.

“Prostituisaun hanesan problema sosiál ne’ebé akontese, ema barak dehan prostituisaun ne’e krimi. Prostituisaun akontese iha mundu tomak, maibé iha TL komesa buras ne’e tanba família lakon moral,” Alzira hato’o kestaun ne’e ba Matadalan iha Fundasaun Alola, Mascarenhas, Díli, Segunda (01/02/2016).

Nia akresenta mundu modernizadu ona, ita presiza haforsa edukasaun edukasaun ba família para oinsa hadi’a unidade família atu nune’e oan labele hola dalan badak hanesan vida prostituisaun.

Alzira dehan impaktu seluk hamosu prostituisaun barak ne’e tanba falta de kampu traballu no finansiamentu ekonomia iha família mínimu tebes tanba ne’e maka ema hola dalan badak hanesan prostituisaun atu hetan osan lalais.

Alein de ne’e, problema tráfiku umanu, violénsia doméstika mós kontribui ba hamosu prostituisaun. Nia dehan Governu liuhosi SEPFOPE kontinua fó formasaun ba foinsa’e sira atu oinsá bele buka osan rasik la’os liuhosi dalan prostituisaun.

“Prostetuisaun la’os krimi maibé ema ne’ebé esplora ne’e maka krimi. Iha artigu 174 ko’alia kona-ba ema ne’ebé esplora atu bele hetan lukru hosi ema nia serbisu,” Alzira saleinta.

Hatan kona-ba deklarasaun KNK-HIV/AIDS ba publiku liuhosi mídia ne’e hatun dignidade Feto sira? Alzira dehan “ne’e la’os defamasaun. Hatudu realidade katak ita maka ne’e, ita lahatene dadus ne’e los ga lae, maibé ba ha’u ne’e la’os defamasaun tanba nia la ko’alia at maluk sira ne’ebé serbsiu hanesan prostituisaun”.

Problema kampu de traballu sai mós preokupasaun Dekana Fakuldade Siensias Sosiais, Universidade de Díli (UNDIL), Cesaltina Angelina Soares katak joven barak ohin loron laiha serbisu, maske ho idade avansadu ona maibé sei depende ba família.

“Nesesiade obriga ita atu halo saida de’it. Ema barak hili dalan prostituisaun tanba osan, ekonomia família la to’o, sé serbisu laiha di’ak serbisu nu’udar prostituisaun fasil liu,” Cesaltina dehan.

Nia hatutan katak dalabarak ita fó sala ba maluk prostita sira maibé ita hatene saída maka sira nia moris, sira nia nesesidade, ne’ebé halo sira hanoin badak.

Hatan kona-ba prostituisaun ne’e konta lei ga lae? Cesaltina dehan iha rai avansadu sira ne’e la’os krimi, maibé iha kontestu Timor hare ba ita nia kultura, ita nia kondisaun real la permite atu mosu prostituisaun ne’ebé organizada.

Nia husu ba estadu atu kria polítika ida di’ak nune’e it abele prevene prostituisaun iha TL. Nia dehan prostituisaun maka buras no laiha kontrolu hosi estadu maka sei estraga ita nia nasaun iha futuru.

Prostituisaun kontra lei ga lae? Prezidente Komisaun A Parlamentu Nasional Trata Assuntu Lei, Carmelita Moniz hatete prostituisaun ne’e ilegal, labele halo prostituisaun iha ita nia rain.

“Ita lakohi Timoroan sai protestuta tanba ladi’ak iha kestaun moral, kultura, tradisaun. Prostituisaun ne’e illegal, labele halo prostituisaun iha TL,” Carmelita dehan.

Carmelita la menta tebes ema sira fa’an feto prostituisaun (Germo) hodi bosok feto sira ho osan, telemovel. Nia dehan polisia tenke ka’er tiha ema sira Germo ne’e hodi ba hatama iha prizaun Bekora no Glenu tanba sira estraga joven feto sira nia futuru.

Nia dehan iha lei kodigu penal regula ona katak se maka halo pornografia, sesksu sira ne’e hodi ba fa’an, ne’e tama ona ba pornografia no krimi.

Hatan kona-ba tama iha vida prostituisaun tanba ekonomia no kampu detraballu laiha? Carmelita dehan “La’os razaun, to’o agora seidauk akontese iha Timor ema mate tanba hamlaha. Labele hodi razaun dezempregu entaun ha’u tenke ba fa’an ha’u nia-án sai protestuta, lae,”. Governu ohin loron tenta atu hadia dezempregu iha TL.

Ko’alia kona-ba lokalizasaun, Carmelita la aseita tanba, prostetuta ne’e ita halo fali hanesan mane ba sosa feto. Nia esplika ho ita nia kultura no ambiente ida ohin loron la permite atu ita kria lokalizasaun ba prostetuisaun.

Carmelita ho Alzira dehan sé alin feto sira maka sente laiha hahan loron ida  ou rua, laiha dalan atu ba estuda, koko atu hakbesik-án ba Ministériu Solidariedade Sosial, Parlamentu Nasional, Fundasaun Alola atu hetan asistensia.

Entretantu Prezidente Feto Parlamentar, Florentina Smith hatete prostitute hamutuk 1688 ne’e barak tebes ona. Ita presiza halo sensebilizasaun ba prevensaun kona-ba prostituisaun nune’e bele hamenus iha TL.

Maske nune’e Smith dehan iha nasaun demokrásia ema barak dehan iha liberdade atu halo saidá ida de’it, no konsidera prostituisaun hanesan parte da vida, maibé kulturalmente no moralmente la permite atu akontese iha ita nia rain.

“Mete prostituisaun halo lakon ema nia dignidade nu’udar feto, hamate nia futuru edukasaun, no at liu tan maka bainhira hetan isin rua maibé mane la responsabiliza, ne’e hamate vida futura ba dezenvolvimentu,” Smith salienta.

Nia dehan ema deside dalan prostituisaun la’os ekonomia ou dezempregu maibé falta moral iha uma laran tanba ne’e feto barak maka la’o arbiru de’it no to’o ikus tama iha prostituisaun.

“Presiza maka família idak-idak nia moral, família mka tenke hasa’e konsiensia para ema hotu bele moris iha vida di’ak hodi lablele hamosu prostituisaun hanesan meiu ida buka traballu ne’e ha’u la simu,” Smith lamenta.

Hanesan Feto Timoroan, Alzira, Carmelita no Florentina sente laran triste bainhira rona feto barak ohin loron mete vida prostituisaun. Sira husu ba baluk prostituta sira atu labele pastisipa tan ona iha prostituta, koko buka dalan seluk atu bele hadi’a vida ho tratamentu ida dignu iha família no sosiedade. (Efrem)

Matadalan