Indonézia kaer ema na'in 14 ne'ebé hakarak halo viajen ba Síria

Indonézia kaer ona ema na'in 14, inklui labarik sira, bainhira hakarak halo viajen ba Síria, ne'ebé iha ema indonéziu atus resin maka hamutuk ona ho grupu estremista sira hanesan Estadu Islámiku (EI), informa hosi polísia.

Ema indonéziu sira hetan kaer iha loron-domingu ne'e iha aeroportu internasional Jakarta nian bainhira tenta halo viajen iha aviaun ida ba Bangkok, ne'ebé iha planu hodi liu ba Síria, hatete hosi porta-vós polísia hosi Jakarta Muhammad Iqbal.

Entre ema identifikadu sira hosi autoridade sira iha família ida ho labarik na'in tolu, ne'ebé mai hosi Tangerang, iha oeste Jakarta nian, haktuir hosi responsável ne'e liuhosi komunikadu. Na'in lima seluk, inklui pelumenus labarik na'in ida, mai hosi parte illa Kalimantan nian.

Grupu ne'e agora iha hela aeroportu no polísia tenta deskobre mós identidade hosi ema sira seluk.

Polísia la hatete katak ema sira ne'e iha hanoin atu hamutuk ho EI.

To'o fulan-Dezembru, ema indonéziu na'in 200 resin maka deportadu hosi Turkia hafoin falla tiha iha tentativa hodi tama iha Síria, haktuir hosi informasaun hosi "think tank" ida ho sede iha Jakarta.

SAPO TL ho Lusa