Governu timoroan lansa sistema foun, iha faze pilotu, hodi aselera prosesu alfándega nian

Hahú semana ne'e governu timoroan tama iha funsionamentu ba programa pilotu foun ida ne'ebé sei permiti ba Administrasaun Alfándega nian hodi aselera prosesu ba libertasaun hosi merkadoria sira, hodi fasilita importasaun no esportasaun.

Santina Cardoso, ministra Finansa, fó sai informasaun hosi programa "autoavaliasaun" iha enkontru ida ne'ebé partisipa hosi membru sira hosi Asosiasaun Despaxante Alfándega sira nian no membru sira seluk.

"Reforma hosi Administrasaun Alfándega nian iha etapa oioin. Ami presiza atualiza lei sira, hametin sistema informátiku sira, uniformiza ami nia prátika sira tuir norma rejionál no internasionál sira no garanti katak ami nia funsionáriu sira iha formasaun no koñesimentu nesesáriu hodi bele hala'o sira nia tarefa ho di'ak", esplika hosi governante.

"Reforma sira no alterasaun sira tenki halo agora. Ami tenki iha dalan foun sira hodi halo serbisu sira, inklui teknolojia foun sira ne'ebé sei entrega mai ami iha komunidade komersiál rejionál sira. Ne'e sei eziji buat barak hosi ami maibé ha'u fiar katak ami bele hetan susesu", nia hatutan.

Iha kauza maka hadi'a modelu emprezariál sira hodi prosesa merkadoria sira ho dalan efisiente liu, ho programa ida ne'ebé inklui formasaun ba despaxante sira no funsionáriu alfándega sira nian hodi halo lalais prosesu.

José Abílio, diretór jerál hosi Alfándega, destaka susesu hosi faze dahuluk formasaun nian, pozitivu ba serbisu sira ne'ebé sei iha "deklarasaun importante sira" no ba importadór sira ne'ebé sei haree sira nia merkadoria sira "hetan tratamentu profisionál".

Despaxante na'in tolu halo ona teste ba sistema foun ne'ebé permiti verifika, lalais, ba impresu loloos sira.

"Bainhira sistema sertifika katak sira nia deklarasaun hanesan verde, ne'ebé signifika katak despaxante sira kumpri ona rekizitu sira no bele avansa hodi selu direitu sira no hodi rekolla merkadoria sira. Ne'e sei hamenus tempu hosi prosesamentu sira iha loron barak nia laran", refere hosi Ministériu Finansa iha komunikadu.

"Bainhira sistema sertifika deklarasaun sira ho kór mean ka kór amarelu, ne'e signifika katak despaxante sira la fó informasaun sufisiente sira ka deklarasaun sira selesionadu ba auditoria ka inspesaun. Despaxante ne'e tenki kontakta Alfándega hodi ko'alia asuntu ne'e", refere.

Autoridade sira dezenvolve mós "medida pós-auditoria sira hodi hetan no kastigu ema ruma ne'ebé hakarak lohi iha prosesu ne'e", refere.

Nia objetivu maka aumenta neineik projetu-pilotu ba despaxante sertifikadu sira, "ne'ebé sei asegura ho susesu ba sistema alfándega foun sira ho nia operasionalizasaun loloos iha tinan 2017".

"Sistema hosi autoavaliasaun sei rekompensa importadór no esportadór sira ne'ebé halo tuir lei no permiti mós ba Alfándega dedika liu rekursu sira hodi ko'alia ho ema sira ne'ebé la kumpri", hatutan hosi José Abílio.

"Ne'e sei reprezenta poupansa boot ida ba importadór sira no, iha instánsia ikus, ba konsumidór sira", nia hatete.

Programa ne'e dezenvolve ho apoiu hosi Banku Mundiál.

SAPO TL ho Lusa