VICENTE BUDU KARTA LEVANTAMENTU IMUNIDADE

Bankada parlamentar FRETILIN, konsidera Prezidente Parlamentu Nasional, Vicente Guterres budu karta notifikasaun ne’ebe Tribunal Distrital Dili (TDD), hasai hodi husu PN atu hasai ka levantamentu ba imunidade membru Governu balun ne’ebe deskonfia komete krime.

Tuir deputadu bankada FRETILIN, Francisco Miranda Branco katak, sira durante ne’e hanesan orgaun soberanu ida mas lahatene karta notifikasaun husi Tribunal nian mai PN hodi husu PN atu hasai imunidade ba membru Governu balun nian. Sira rona fali husi ema balun nune’e mos Media.

“Hau hakarak hateten, korespondensia entre orgaun soberania sira ne’e ida deit, mak sekretariadu, ne’ebe karta hot-hotu tenke tama ba sekretaria, depois sekretaria kanaliza ba Prezidente Parlamentu, Vicente Guterres. Dala ruma mos ami sira ne’e (red-deputado) rona fali husi Media, katak notifikasaun husi Tribunal ba entidade Governu nian, tanba buat hot-hotu liu husi odamatan ida, odamatan ne’e maka Prezidente parlamentu, ne’ebe kuandu prezidente parlamentu lakohi fo sai buat ne’e budu iha ne’eba,”hateten Francisco Branco ba Jornalista sira iha PN, Sesta (11/03/2016).

Deputado Francisco hatutan, tuir sira nia hanoin katak tenke halo afirmasaun, tanba Timor-Leste (TL) hanesan Estado de direito ne’e los, lei ba hot-hotu hanesan, ne’ebe politiku sira uza konsiensia deit katak se halo sala ho konsiensia ba hatan deit iha tribunal, laiha problema, la persiza hasai imunidade.

“Politiku sira ne’ebe mak sente an katak nia halo duni ida ne’e, diak liu kopera ho lei, hodi nune’e fo exemplu diak, fo edukasaun civika ba sosiedade katak laiha rezistensia sira seluk, kuandu lei husu ita nia koperasaun ita kopera labele halo rezistensia tan. Povu bele dehan katak tanba sa ami bele imi labele, maibe ita nia lei dehan hot-hotu hanesan, mais pratika oinseluk fali, ne’e maka preukupasaun ba ami nia partidu,” afirma Branco.

Kestaun kona ba karta notifikasaun husi Tribunal mai iha meja Parlamentu Nasional, deputados sira sempre foti asuntu ne’e, maibe Prezidente PN latau importansia.

“Ha’u hanoin tempu ona katak situasaun sira ne’e labele akontese, tanba ida ne’e mos bele lori sidadaun sira sente hanesan diskriminadu husi ukun nain no nune’e mos sira ne’ebe la’os, maibe ita nia lei dehan klaru katak tratamentu ne’e hanesan deit, laiha lei ida espesifiku ba ukun nain no lei espesifiku ida la’os ukun nain, iha kontestu ida ne’e maka politiku sira ne’ebe kaer ukun tenke hatene para ita labele husik hela situasaun ida ne’ebe halo ema lasatisfeito,” dehan nia.

Entretantu, karta ne’ebe mak Tribunal Distrital Dili haruka ba iha meja PN atu hasai imunidade maka hanesan Vicente Guterres atual Prezidente PN, atual Sekretaria Estado Artes no Kultura, Isabel Ximenes. Mia

Jornal Nacional